Fýtboldan Ulttar lıgasy: Búgin Qazaqstan quramasy alǵashqy oıynynda Norvegııamen kezdesedi

<p>ASTANA. KAZINFORM - Búgin, 6 qyrkúıekte Qazaqstan quramasy UEFA Ulttar lıgasyndaǵy alǵashqy oıynyn Norvegııaǵa qarsy ótkizedi.</p>

El quramasy V lıgasy úshinshi tobynda Norvegııa, Slovenııa jáne Avstrııa quramalarymen synǵa túsedi.

Kezdesý qazaqstandyq ýaqytpen 19:00-de bastalyp, «Qazsport» telearnasynan tikeleı efırde kórsetiledi.

Atalǵan oıynda Nıderland elinen kelgen Allard Lındhaýt bas tóreshi mindetin atqarady. Oǵan otandastary Ioost van Zýılen men Rogır Honıg kómekshilik jasaıdy. Tórtinshi tóreshi de sol eldiń ókili Aleks Bos.

Óz tarıhynda eki qurama alǵash ret sheberlik baıqasady.

Qazaqstan quramasy sapynda Maksım Samorodov, Ramazan Orazov syndy fýtbolshylar jaraqatyna baılanysty búgingi oıynǵa qatysa almaýy múmkin. Bul kezdesý reseılik maman Stanıslav Cherchesovtiń óz qyzmetindegi alǵashqy oıyny bolmaq.

Al Norvegııa sapynda barlyq negizgi oıynshylar aldaǵy kezdesýge saqadaı saı. Olardyń qatarynda álem fýtbolynyń jaryq juldyzdary Erlıng Holand («Manchester Sıtı», Anglııa) pen Martın Edegor («Arsenal», Anglııa) bar.

Aıta ketsek, qazaqstandyq fýtbolshylar Ulttar lıgasynda tórtinshi márte baq synaıdy. Qazirge deıin 20 kezdesýde 7 márte jeńiske jetip, 5 márte teń oınasa, 8-de qarsylasyna ese jiberdi.

2022/23 jylǵy maýsymda C lıgasynda Ázerbaıjan, Slovakııa, Belarýsti artta qaldyryp, V lıgasynda baq synaýǵa múmkindik aldy.

Osyǵan deıin qazaqstandyqtar paralımpıadada úsh sport túrinen baq synaıtynyn jazǵan edik.