Fýtboldan premer-lıga: 20-týr oıyndarynyń kestesi jarııalandy

ASTANA. QazAqparat – Búgin fýtboldan premer-lıga komandalary arasyndaǵy el birinshiliginiń 20-týry bastalady, dep habarlaıdy QazAqparat tilshisi.

Atalǵan týr 19 jáne 20 tamyz kúnderi ótedi. Senbide 3 oıyn bolsa, jeksenbige 4 kezdesý belgilengen.

Búgin saǵat 17:00-de «Shahter» (Qaraǵandy) men «Oqjetpes» (Kókshetaý) atalǵan týrdyń alǵashqy kezdesýin ótkizedi.

Odan keıin 19:00-de «Kaspıı» (Aqtaý) men «Qyzyljar» (Petropavl) jasyl alańǵa shyqsa, 21:00-de «Aqsý» (Pavlodar oblysy) men «Atyraý» kezdesedi.

Al 20 tamyzda 17:00-de «Jetisý» (Taldyqorǵan) men «Maqtaral» (Túrkistan oblysy), odan keıin 19:00-de «Astana» men «Qaısar» (Qyzylorda) oınaıdy.

Atalǵan týrdy 20:00-de «Aqtóbe» men «Tobyl» (Qostanaı), 21:00-de «Ordabasy» (Shymkent) men «Qaırat» (Almaty) sheberlik baıqasady.

Aıta ketsek, qazirge deıin kósh basynda 45 upaımen «Ordabasy» keledi. Odan keıingi oryndardaǵy «Aqtóbe» men «Astananyń» enshisinde 39 upaıdan bar.

Eske salsaq, budan buryn fýtboldan birinshi lıgada «Elimaı» týrnır kestesindegi jaǵdaıyn jaqsartty.