Fýtboldan klýbtar arasyndaǵy álem chempıonaty: «Real Madrıd» fınalǵa shyqty
Ekinshi joldama Ispanııanyń «Real Madrıd» klýbyna buıyrdy. Ispanııalyq klýb 8 aqpanda jartylaı fınalda Egıpettiń «Al-Ahlı» komandasyn orta jolda qaldyrdy.
Oıyn barysynda ıspanııalyq klýbtan Vınısıýs Jýnıor 42, Federıko Valverde 46, Rodrıgo 92, Serhıo Arrıbas 98-mınýtta mergendik tanytty. Oǵan «Al-Ahlı» sapynan Alı Malýl penaltıden 65-mınýtta bir golmen jaýap qaıyrdy.
Egıpettik klýb aldymen Jańa Zelandııanyń «Oklend Sıtı» klýbyn 3:0 esebimen qapy qaldyrsa, odan keıin shırek fınalda AQSh-tyń «Sıetl Saýnders» klýbyn 1:0 esebimen jeńdi.
Al «Real Madrıd» týrnırdegi alǵashqy oıynyn birden jartylaı fınaldan bastady.
Endi «Real Madrıd» 11 aqpanda fınalda Saýd Arabııasynyń «Al-Hılıal» komandasymen sheberlik baıqasady. Atalǵan klýb jartylaı fınalda Brazılııanyń «Flamengo» klýbyn 3:2 esebimen tize búktirdi.
Týrnırdiń 3-oryn úshin saıys pen fınaly 11 aqpanǵa belgilengen.
Atalǵan týrnır 2000 jyldan beri turaqty túrde ótkizilip keledi. Buǵan deıin 11 komanda jeńimpaz atandy. Olardyń arasynda «Real Madrıd» 2014, 2016, 2017, 2018 jyldarda 4 márte chempıon atanǵan edi.
Foto: sports.ru