Fýtboldan klýbtar arasyndaǵy álem chempıonatyna qatysatyn komandalar anyqtaldy

<p>Fýtboldan klýbtar arasyndaǵy 2023 jylǵy álem chempıonatyna qatysatyn barlyq komanda anyqtaldy, dep habarlaıdy <a href="Kazinform" target="_blank" rel="noopener">Kazinform.</a></p>

Dúbirli doda Saýd Arabııasynyń Djıdda qalasynda 12-22 jeltoqsan aralyǵynda ótedi. Oǵan barlyǵy jeti komanda qatysady. 

Bıyl álem chempıonatynda «Flýmınense» (Brazılııa), «Manchester Sıtı» (Anglııa), «Leon» (Meksıka),«Ýrava Red Daımonds» (Japonııa), «Al-Ahlı» (Egıpet), «Oklend Sıtı» (Jańa Zelandııa) jáne «Al-Ittıhad» (Saýd Arabııasy) synǵa túsedi. 

12 jeltoqsanda birinshi týrda «Al-Ittıhad» pen «Oklend Sıtı» týrnırdi bastaıdy. Bul juptyń jeńimpazy ekinshi týrda 15 jeltoqsanda «Al-Ahlı» komandasymen kezdesse, sol kúni «Leon» men «Ýrava Red Daımonds» sheberlik baıqasady.

Al 18 jeltoqsanda jartylaı fınalda «Flýmınense» «Al-Ahlı» men birinshi týrdyń jeńimpazymen bolǵan kezdesýdiń jeńimpazymen jasyl alańǵa shyǵady.

Taǵy bir jartylaı fınalda 19 jeltoqsanda «Manchester Sıtı» «Leon» men «Ýrava Red Daımonds» jubynyń jeńimpazymen kezdesedi.

22 jeltoqsanda fınal men 3-oryn úshin oıyndar ótkiziledi. Bul atalǵan formatta ótip jatqan sońǵy týrnır. 2025 jyldan bastap klýbtar arasyndaǵy álem chempıonatynda 32 komanda qatysady dep josparlanyp otyr.

Atalǵan doda 2000 jyldan beri turaqty túrde ótkizilip keledi. Buǵan deıin 11 komanda jeńimpaz atandy.

Atap aıtqanda, Ispanııanyń «Real Madrıd» klýby - 5, «Barselonasy» - 3, Brazılııanyń «Korıntıansy» men Germanııanyń «Bavarııasy» - 2, Anglııanyń «Lıverpýl», «Chelsı», «Manchester ıÝnaıted», Brazılııanyń «Internasonal», «San-Paýlý», Italııanyń «Mılan» jáne «Internatsıonale» komandalary bir-birden jeńis tuǵyryna kóterildi.