Fýtboldan Qazaqstan sýperkýbogy alǵash ret shetelde ótkiziledi
Sýperkýbok oıyndary bıyl 17-shi márte uıymdastyrylyp otyr. Bul kezdesýde ótken jylǵy el chempıony atanǵan «Ordabasy» men Qazaqstan kýbogynyń ıegeri «Tobyl» básekege túsedi.
Aıta ketsek, Eýropanyń úzdik fýtbol lıgalarynda sýperkýbokty shet elde ótkizý burynnan beri tájirıbe júzinde iske asyp keledi. Mysaly, Frantsııa sýperkýbogynyń chempıony 2009-2022 jyldar aralyǵynda 8 memlekette anyqtaldy. Al Italııa sýperkýbogynyń jeńimpazy 6 elde belgili boldy. Sondaı-aq Ispanııa sýperkýbogynyń oıyndary keıingi 3 jylda Saýd Arabııasynda ótkizilýde.
«Bizdiń ıdeıamyz - Sýperkýbokty alǵash ret shetelge shyǵarý jáne oǵan halyqaralyq sıpat berý. Biz qazaqstandyq fýtboldyń órleýine kýá bolyp otyrmyz. Jetistikterimizdi álem elderi erekshe qyzyǵýshylyqpen baqylaı bastady. Ulttyq quramanyń nátıjesi el fýtbolyna qyzyǵýshylyqty arttyrdy. Ulttyq qurama naýryz aıynda 2024 jylǵy Eýropa chempıonaty pleı-off kezeńi aıasynda Grekııamen mańyzdy oıyn ótkizedi. Fýtbolshylarymyzdyń osy oıyn aldynda jaqsy kúıde bolǵanyn qalaımyz. Sondyqtan Antalııadaǵy Sýperkýbok oıyny mańyzdy aspektilerdiń biri retinde sanalmaq. Bul qalany tańdaýdaǵy sebebimiz, qańtar aıynan bastap, kóptegen otandyq klýbtyń oqý-jattyǵý jıyndarynyń ótýine baılanysty», - dedi Qazaqstan kásipqoı fýtbol lıgasynyń prezıdenti Rafael Garıbıan.
Oıyn «Tıtanık Mardan» stadıonynda ótedi. Buǵan deıin atalmysh alańda Qazaqstan ulttyq quramasy men ózge elder birneshe márte joldastyq kezdesýlerin uıymdastyrǵan.
«Antalıaspor» klýbynyń jattyǵý bazasy sanalatyn stadıon kezinde fýtboldan 17 jasqa deıingi jasóspirimder arasyndaǵy Eýropa chempıonatyn qabyldaǵan.
Oıyn Astana ýaqyty boıynsha saǵat 18:00-de bastalady. Kezdesýdi otandyq «Qazsport» respýblıkalyq telearnasy tikeleı efırde kórsetiledi.
Eske salsaq, Ulttar lıgasynda fýtboldan Qazaqstan quramasynyń oıyn kestesi belgili boldy.