Fýtboldan Qazaqstan men Danııanyń bas bapkerleri búgingi oıynǵa baǵa berdi

ASTANA. QazAqparat - Fýtboldan 2024 jylǵy Eýropa chempıonaty irikteý satysynda Qazaqstan quramasy Danııany jeńgennen keıin bas bapkerler oıyn jaıynda pikirin bildirdi, dep habarlaıdy QazAqparat tilshisi.

Aıta ketsek, qazaqstandyq fýtbolshylar elordada Danııadan 3:2 esebimen basym tústi.

Kezdesýde el quramasynan Baktıer Zaınýtdınov 73-mınýtta penaltıden gol soqsa, Ashat Taǵybergen 86, Abat Aıymbetov 89-mınýtta mergendik tanytty. Danııa quramasynan Rasmýs Heılýnn 21, 36-mınýtta eki gol soqqan edi.

«Árıne, jeńiske óte qýanyshtymyz. Qolaısyz jeńilisten keıin óz alańymyzda jankúıerler aldynda oń nátıjege qol jetkizýge tyrystyq. Qarsylas ońaı emes ekenin túsindik. Soǵan qaramastan qalpymyzǵa kelýge kóńil bóldik. Dese de óz alańymyzdaǵy jeńilis quramaǵa birshama áser etti. Sheginerge jer joq. Bul jaıynda oıynshylarmen áńgimelestik. Danııamen kezdesýde birinshi kezeń biz oılaǵandaı bolǵan joq. Eki goldyń soǵylýy qatelikter saldarynan soǵyldy. Ekinshi kezeńde oıynshylardyń bir-birin túsinýi ońaıǵa soqty. Ony ońtaıly paıdalana aldyq», - dedi Qazaqstan quramasynyń bas bapkeri Magomed Adıev.

Danııalyq bas bapkeri Kasper ıÝlmann oıynnyń sońǵy mınýttarynda óz quramasynyń nashar oıyn kórsetkenin atap ótti.

«Qazaqstan quramasyn jeńisimen quttyqtaımyn! Nátıjege kóńilimiz tolmaıdy. Oıynnyń basym bóliginde jaqsy oıyn kórsettik. Al sońǵy 15 mınýt biz úshin óte qolaısyz boldy. Bul taktıkaǵa qatysty emes. Kóńil-kúıge baılanysty. Bul kórsetkish sońǵy ret qaıtalanyp otyr dep oılaımyn», - dedi ol.

Endi Qazaqstan aldaǵy oıynyn 16 maýsymda syrt alańda San-Marınoǵa qarsy ótkizedi.

Búgin N tobynda, sondaı-aq Slovenııa – San-Marıno, Soltústik Irlandııa – Fınlıandııa quramalary kezdesedi.

Foto: sports.kz