Fýtboldan Qazaqstan quramasynyń yqtımal qarsylasy anyqtaldy
2024 jylǵy Eýropa chempıonatynyń joldamasy sarapqa salynǵan jartylaı fınaldyń birinde Grýzııa men Lıýksembýrg quramalary sheberlik baıqasty.
Kezdesý basynan grýzııalyq fýtbolshylar oıyn tizginin qolǵa alýǵa tyrysty. Qarsylas qurama negizinen qorǵanysqa kóbirek kóńil bóldi. Urymtal sátte qarsy shabýylǵa shyqty. Oıynnyń 41-mınýtynda grýzııalyq Býdý Zıvzıvadze qarsylastar qaqpasynan sańylaý taýyp, esep ashyp ketti.
Ekinshi kezeńde lıýksembýrgtik fýtbolshylar belsendi qımyl kórsetti. Olardyń qatarynan Jerson Rodrıgesh 53-mınýtta tarazy basyn teńestirgen edi. Tóreshi odan buryn oıyn erejesiniń buzylýyna baılanysty goldy esepke alǵan joq.
Al 56-mınýtta lıýksembýrgtik Maksım Shano qyzyl qaǵaz alyp, jasyl alańnan qýylsa, oıynnyń 63-mınýtynda grýzııalyq Býdý Zıvzıvadze 63-mınýtta taǵy bir márte mergendik tanytyp, esepti ulǵaıtty.
Endi taǵy bir jartylaı fınaldaǵy Qazaqstan jáne Grekııa kezdesýi 21 naýryzdan 22-ne qaraǵan túni saǵat 00:35-te Qazaqstan jáne Qazsport telearnalarynan tikeleı efırde kórsetiledi.
2024 jylǵy Eýropa chempıonatynyń joldamasy úshin Grýzııa endi 26 naýryzda atalǵan juptyń jeńimpazymen sheberlik baıqasady.
Fınalda jeńimpaz bolǵan qurama Eýropa chempıonaty fınaldyq satysynda F tobyndaǵy Túrkııa, Portýgalııa jáne Chehııa qataryna qosylady.
Kezdesýge nıderlandtyq tóreshiler qazylyq etedi.
Bul juptyń jeńimpazy 26 naýryzda taǵy da syrt alańda Grýzııa quramasymen sheberlik baıqasady. Olar dál qazir Lıýksembýrg quramasynan 2:0 esebimen basym tústi.