Fýtboldan Qazaqstan chempıonatynda «Astana» ekinshi orynǵa kóterildi

<p>ASTANA. KAZINFORM &mdash; Fýtboldan Qazaqstan chempıonatynyń altynshy týrynda &laquo;Turan&raquo; Shymkentte &laquo;Astana&raquo; komandasyn qabyldady.</p>

Túrkistandyqtar kósh sońyndaǵy komandalardyń biri bolsa, elordalyqtar aldyńǵy lekte kele jatqan edi. 

Birinshi taımda 5-mınýtta-aq «Turan» sapyndaǵy Fedı Ben Choýg alańnan qýylyp, «Astana» basymdylyqqa ıe boldy. Ekinshi kezeńde 56-mınýtta Aleksa Amanovıch 11 metrlik aıyp dobyn dál oryndasa, 9 mınýttan keıin Ýsman Kamara esepti 2:0-ge jetkizdi.

Osy oıynnan keıin 10 upaı jınaǵan Grıgorıı Babaıannyń shákirtteri týrnır kestesinde «Aqtóbeni» qýyp jetip, ekinshi orynǵa kóterildi. 

Bul týrda óz alańynda Astananyń «Jeńisin» qabyldaǵan qostanaılyq «Tobyldyń» kósh basyna kóteriletindeı múmkindigi bar edi. Birinshi taımda 17-mınýtta Igor Ivanovıch esepti ashqanymen, «Tobyl» sol basymdylyqty saqtaı almady. 77-mınýtta Arbı Manaı tarazy basyn teńestirip ketti – 1:1. 

Osylaısha, kútpegen jerden upaı joǵaltqan «Tobyl» (9 upaı) ázirshe úzdik úshtikti túıindep tur.

«Atyraý» óz alańynda Petropavldyń «Qyzyljaryn» 2:0 esebimen tize búktirdi. 51-mınýtta Nıkolaı Sıgnevıch, sálden soń ıAkob Novak «Qyzyljar» qaqpasynyń kiltin tapty. 

Eske sala keteıik, budan buryn el chempıonatynda «Astana» men «Tobyldyń» teń tarqasqanyn jazǵan bolatynbyz. 

Sondaı-aq «Jetisý» óz alańynda «Shahterdi» utty.