Fýtboldan Eýropa chempıonaty: Týrnırdiń úzdik oıynshysy belgili boldy

NUR-SULTAN. QazAqparat - Fýtboldan Eýropa chempıonatynyń úzdik oıynshysy anyqtaldy, dep habarlaıdy QazAqparat tilshisi.

UEFA búkil oıynshylardyń múmkindigin saraptaı otyryp bul ataqqa Italııa quramasynyń qaqpashysy Djanlýıdjı Donnarýmma laıyq degen qorytyndyǵa keldi.

Qaqpashy óziniń nebári 22 jasta ekenine qaramastan ulttyq qurama sapynda 33 kezdesýde jasyl alańǵa shyǵyp úlgergen.

Ol bıylǵy qurlyqtyq doda fınalyndaǵy penaltı serııasynda eki soqqyny qaıtardy.

Osylaısha Italııanyń Anglııany jeńýine úles qosyp, jeńimpaz tuǵyrynan kórindi.

Aıta keteıik, Djanlýıdjı Donnarýmma Eýropa chempıonatynda óz quramasynyń negizgi qaqpashysy boldy.

Tek toptyq kezeńdegi Ýelspen ótken jeńisti oıyn sońynda ony áriptesi Salvatore Sırıgý almastyrdy.

Ol qurlyqtyq dodada 719 mınýt jasyl alań tórinen kórindi. Bul - atalǵan týrnırge qatysqan barlyq fýtbolshydan joǵary kórsetkish.

Sondaı-aq, ol toptyq kezeńde óziniń qaqpasyna bir de bir gol jibergen joq.

Eske salaıyq, 11 shilde kúni fınalda Italııa Anglııany jeńip, qurlyqtyq dodanyń chempıony atandy.