Fýtboldan Eýropa chempıonaty: Frantsııa quramasy Aýstrııadan basym tústi

<p>ASTANA. KAZINFORM - Fýtboldan 2024 jylǵy Eýropa chempıonatynyń tórtinshi oıyn kúnin D tobyndaǵy Aýstrııa men Frantsııa quramalary túıindedi.</p>

Jankúıerler qaýymy bul oıyndy asyǵa kútti deýge negiz bar. Frantsııa sapynda Kılıan Mbappe, Ýsman Dembele, Antýan Grızmann, N'Golo Kante sekildi juldyzdar bar. Árbiri oıyn taǵdyryn sheship kete alady.

Sondyqtan olarǵa Aýstrııamen kezdesýde jeńiske jetý qıynǵa soǵa qoımaıdy degen boljam aıtylǵan edi.

Aýstrııalyq fýtbolshylar azýly qarsylasynyń yǵyna jyǵyla qoıǵan joq. Qorǵanysta saýatty oıyn kórsetip, frantsııalyq oıynshylardyń shabýylyna toıtarys berdi.

Bul Dıde Deshamnyń shákirtterine unaǵan joq. Basymdyqty odan saıyn arttyra tústi. Nátıjesinde 38-mınýtta Kılıan Mbappe avstrııalyq birneshe fýtbolshyny aldap ótip, qaqpa mańynda turǵan áriptesine áýelete dop tastaǵan edi. Ony syrtqa shyǵaryp jiberýge árekettengen avstrııalyq Maksımılıan Veberdiń baspen urǵan doby óz qaqpasynda týlap jatty.

Ekinshi kezeńde qos qurama shabýylǵa shyqty. Dese de esep ózgergen joq.

Osylaısha Frantsııa qarsylasynan 1:0 esebimen basym tústi.

Aıta ketsek, budan buryn E tobynda Rýmynııa Ýkraınany 3:0, Slovakııa Belgııany 1:0 esebimen tize búktirdi.

Endi birinshi týr oıyndaryn 18 maýsymda F tobynda Túrkııa men Grýzııa, Portýgalııa men Chehııa quramalary aıaqtaıdy.