Fýtboldan el birinshiliginde «Aqtóbe» úshinshi orynǵa kóterildi

ASTANA. QazAqparat - Búgin fýtboldan Premer-lıga komandalary arasyndaǵy el birinshiliginiń 12-týrynyń alǵashqy oıyn kúni aıaqtaldy, dep habarlaıdy QazAqparat tilshisi.

El birinshiliginde «Aqtóbe» komandasy qatarynan eki márte jeńiske jetti. Bul joly óz alańynda qaraǵandylyq «Shahterdi» 2:0 esebimen súrindirdi.

Oıyn barysynda 6-mınýtta aqtóbelik klýbtan Arman Keńesov qarsylasyn qapy qaldyrdy. Al 71-mınýtta Lýka Gadranı esepti ústemeleı tústi.

Atalǵan jeńisten keıin «Aqtóbe» 24 upaımen úshinshi orynǵa kóterildi. Alǵashqy eki orynda «Astana» men «Ordabasy» tur.

Taǵy bir kezdesýde shymkenttik «Ordabasy» óz alańynda «Atyraýdan» 2:1 esebimen basym tústi.

Oıynda alań ıeleri qatarynan Bobýr Abdahalıkov 25, Sergeı Malyı 30-mınýtta mergendik tanytty. Oǵan atyraýlyq klýbtan Nsýngýsı Efıong 49-mınýtta bir golmen jaýap qaıyrdy.

Eske salsaq, budan buryn «Qaırat» «Oqjetpesten» 2:1 esebimen basym tústi.

Sondaı-aq, «Astana» «Aqsýdy», «Tobyl» «Qyzyljardy» 1:0 esebimen súrindirdi.

Endi 4 maýsymda «Jetisý» men «Kaspıı», «Qaısar» men «Maqtaral» kezdesedi.