Fýtboldan el birinshiliginde «Aqtóbe» týrnır kestesindegi pozıtsııasyn jaqsartty

NUR-SULTAN. QazAqparat - Fýtboldan Premer-lıga komandalary arasyndaǵy Qazaqstan birinshiligi 17-týrynyń alǵashqy oıyn kúni aıaqtaldy, dep habarlaıdy QazAqparat tilshisi.

Atalǵan týrda «Aqtóbe» óz alańynda Pavlodar oblysynyń «Aqsý» komandasynan 1:0 esebimen basym tústi.

Kezdesý barysynda aqtóbelik komandadan Álibek Qasym 14-mınýtta penaltıden gol soǵyp, jeńiske jetti.

Atalǵan jeńisten keıin «Aqtóbe» 35 upaımen birinshi orynda tur. Basty qarsylasy - «Astanadan» 5 upaıǵa uzap ketti.

Qaraǵandynyń «Shahteri» syrt alańda Túrkistan oblysynyń «Maqtaralyn» 2:0 esebimen tize búktirdi. Bul oıynda Evgenıı Kobzar 19, Roher Kanıas 71-mınýtta mergendik tanytty.

Nátıjesinde «Shahter» 24 upaımen jetinshi orynǵa kóterildi.

Sondaı-aq, oraldyq «Aqjaıyq» óz alańynda «Atyraýdy» 4:2 esebimen jeńdi.

Endi atalǵan týrda 27 tamyzda «Qyzyljar» (Petropavl) men «Turan» (Túrkistan), «Kaspıı» (Aqtaý) men «Qaırat» (Almaty), «Taraz» ben «Astana» (Nur-Sultan), «Tobyl» (Qostanaı) men «Ordabasy» (Shymkent) komandalary kezdesedi.