Fýtboldan el birinshiligi: «Ordabasy» syrt alańda jeńiske jetti

NUR-SULTAN. QazAqparat - Fýtboldan Premer-lıga komandalary arasyndaǵy Qazaqstan birinshiliginiń on besinshi týrynda eki oıyn ótkizildi, dep habarlaıdy QazAqparat tilshisi.

Oralda jergilikti «Aqjaıyq» pen Shymkenttiń «Ordabasy» komandalary kezdesti. Oıyn taǵdyryn 77-mınýtta shymkenttik Odılbek Abdýmajıtov soqqan jalǵyz gol sheshti. Nátıjesinde shymkenttikter 1:0 esebimen jeńiske jetip, týrnır kestesindegi jaǵdaıyn jaqsartyp aldy.

Al Pavlodarda «Aqsý» men qaraǵandylyq «Shahter» 1:1 esebimen teń tarqasty. Oıyn barysynda alań ıelerinen Erkebulan Tuńǵyshbaev 26-mınýtta esep ashsa, 56-mınýtta qaraǵandylyq shabýylshy Roman Mýrtzazaev tarazy basyn teńestirdi.

Atalǵan týrdaǵy qalǵan oıyndar 26 maýsymda ótkiziledi. Bul kúni 17:00-de «Qyzyljar» (Petropavl) men «Tobyl» (Qostanaı), 19:00-de «Kaspıı» (Aqtaý) men «Turan» (Túrkistan), «Taraz» ben «Qaırat» (Almaty) oınaıdy.

Oıyndardy 21:00-de «Aqtóbe» men «Astana» (Nur-Sultan), «Maqtaral» (Túrkistan oblysy) men «Atyraý» komandalary túıindeıdi.