Fýtboldan birinshi lıgada «Jetisaı» besinshi márte jeńiske jetti

<p>ASTANA. KAZINFORM - Fýtboldan birinshi lıga komandalary arasyndaǵy Qazaqstan birinshiliginde jetinshi týrynda &laquo;Jetisaı&raquo; komandasy syrt alańda &laquo;Aqjaıyqtan&raquo; basym tústi.</p>

Túrkistan oblysynyń namysyn qorǵap júrgen klýb bıyl ekinshi lıgadan shyqqan edi. Soǵan qaramastan dop dodasynda joǵary nátıje kórsetip keledi. Qazirge deıin alty oıynnyń tórteýinde jeńiske jetip, bireýinde teń tússe, bireýinde qarsylasyna ese jiberdi.

Oral qalasynyń «Aqjaıyǵy» - tájirıbeli fýtbolshylarmen tolyqqan ujym. Soǵan qaramastan bıyl nebári bir márte jeńiske jetip, týrnır kestesinde sońǵy oryndardyń birin mise tutyp turǵan jaıy bar.

Kezdesý barysynda «Jetisaı» jaqsy oıyn órnegin kórsetti. Nátıjesinde qarsylasynan 2:1 esebimen basym tústi. Atalǵan jeńisten keıin týrnır kestesinde 16 upaımen ekinshi orynǵa kóterildi.

Dál osyndaı upaımen birinshi orynda turǵan Aqtaýdyń «Kaspııi» óz alańynda Qyzylordanyń «Qaısar-2» komandasyn 3:1 esebimen tize búktirdi.

Sondaı-aq, syrt alańda «SD Family» «Aqtóbe-2» klýbyn 4:1, «Ulytaý» «Tarazdy» 2:1 esebimen jeńdi.

Al «Han táńiri» «Túrkistannan» 4:0 esebimen basym tússe, «Ekibastuz» ben «Taraz» 0:0 esebine qanaǵat bildirdi.

Endi 17 mamyrda «Arys» pen «Oqjetpes», «Qaırat-2» men «Qyran» oınaıdy.

Eske salsaq, erteń fýtboldan QFL Áıelder lıgasynyń oıyndary bastalady.