Fýtboldan birinshi lıgada «Kaspıı» bes oıyn boıy jeńe almaı keledi

<p>ASTANA. KAZINFORM - Fýtboldan Birinshi lıga komandalary arasyndaǵy Qazaqstan birinshiliginiń XVІІ týry máresine jetti.</p>

Bıyl Premer-lıga joldamasynan úmitker bolǵan Jezqazǵannyń «Ulytaýy» men Aqtaýdyń «Kaspııi» 0:0 esebimen teń tústi.

Bıylǵy dop dodasyn aqtaýlyq komanda sátti bastaǵan edi. Alaıda sońǵy týrlarda jankúıer senimin aqtaı almaı júr. Bes oıyn boıy jeńiske jete almaı keledi. Saldarynan týrnır kestesinde 26 upaımen altynshy oryndy mise tutyp tur. Birinshi oryndaǵy «Oqjetpesten» on upaıǵa qalyp ketti.

Sondaı-aq atalǵan týrda elordalyq «SD Family» almatylyq «Qaırat-2» komandasyna 3:6, «Aqtóbe-2» óskemendik «Altaıǵa» 0:2, oraldyq «Aqjaıyq» «Tarazǵa» 1:2 esebimen jol berdi.

Eske salsaq, budan buryn 25 shildede «Oqjetpes» «Arysty» 7:1, «Ekibastuz» «Han táńirin» 2:1 esebimen jeńse, «Jetisaı» «Qaısar-2» komandasymen 0:0 esebimen teń oınady.