Fýtboldan birinshi lıgada «Aqjaıyq» «Qaırat-Jastardy» oısyrata utty

ASTANA. QazAqparat – Fýtboldan birinshi lıga komandalary arasynda el chempıonatynyń 8-týrynda Oraldyń «Aqjaıyǵy» Almatyda jergilikti «Qaırat-Jastar» komandasymen alańǵa shyqty, dep habarlaıdy QazAqparat tilshisi.

Premer-lıgaǵa shyǵýdan dámeli oraldyqtar ótken týrda óz alańynda kútpegen jerden ońtústikqazaqstandyq «Arystan» 0:1 esebimen jeńilip qalǵan edi.

Bul joly qazaqstandyq maman Igor Prohnıtskııdiń shákirtteri alańda tolyqtaı ústemdik etti. Ásirese, ýkraınalyq Mıkola Agapov het-trıktiń avtory atandy. Taǵy bir goldy reseılik Evgenıı Kobzar engizdi.

Osylaısha, 4:0 esebimen jeńiske jetken «Aqjaıyq» týrnır kestesinde 16 upaımen úshinshi orynǵa kóterildi.

«Astananyń» jastaryn 3:0 esebimen utqan «Arys» (18 upaı) ekinshi orynda. Semeıdiń «Elimaıy» 19 upaımen kósh bastap keledi.

Eske sala keteıik, budan buryn fýtboldan birinshi lıgada «Aqjaıyqtyń» qarsylasyn iri eseppen jeńgenin jazǵan bolatynbyz.