Fýtboldan bas bapker Magomed Adıev qyzmetinen kete me

ASTANA. QazAqparat – Elimizdiń fýtboldan ulttyq quramasynyń bas bapkeri Magomed Adıev qyzmetin aýystyrýy múmkin degen áńgimege qatysty túsinik berdi, dep habarlaıdy QazAqparat tilshisi Fýtbol federatsııasynyń baspasóz qyzmetine silteme jasap.

«Qurmetti dostar, sońǵy kezderi BAQ-ta meniń bolashaǵym jaıly aqparat tarap jatyr. Meniń bar nazarym Qazaqstan ulttyq quramasynda jáne biz EÝRO-2024 irikteý kezeńindegi aldaǵy matchtarǵa daıyndalyp jatqanymyzdy taǵy da atap ótkim keledi. Sondyqtan irikteý aıaqtalǵanǵa deıin qyzmetterdi qosa atqarý, ne bolmasa basqa da máseleler qarastyrylyp jatqan joq. Men óz oıymdy tolyqtaı jetkizdim dep úmittenemin», - delingen túsiniktemede.

Sondaı-aq, fýtboldan ulttyq quramanyń bas jattyqtyrýshysy qyrkúıekte Fınlıandııa men Soltústik Irlandııaǵa qarsy mańyzdy oıyndar kútip turǵanyn aıtty.

«Bizge jankúıerlerimizdiń qoldaýy qajet. Barshańyzdy «Astana Arenada» kútemiz. Alǵa, Qazaqstan!», - deıdi ol.

Aıta ketsek, keıbir sporttyq BAQ-ta baıandalǵandaı «Ahmat» fýtbol klýby M. Adıevti bas bapker qyzmetine shaqyrǵan.