Fýtboldan «Ańyzdar kýbogynda» qazaqstandyqtar úshinshi oryn aldy

NUR-SULTAN. QazAqparat - Fýtboldan elimizdiń ańyzdar quramasy «Ańyzdar kýbogy» týrnırinde qola júldeger atandy, dep habarlaıdy QazAqparat tilshisi.

El quramasy úshinshi oryn úshin saıysta álemniń ańyzdar quramasyn 10:7 esebimen tize búktirdi. Atalǵan kezdesýde Samat Smaqov úzdik oıynshy ataǵyna ıe boldy.

Qurama sapynda Davıd Lorııa, Almat Bekbaev, Samat Smaqov, Nurbol Jumasqalıev, Qaırat Nurdáýletov, Farhadbek Irısmetov, Edýard Sergıenko, Sergeı Skoryh, Marat Haırýllın, Ulyqbek Asanbaev, Qaırat Áshirbekov oıyn kórsetti.

Toptyq kezeńde qazaqstandyqtar Reseıge 4:8 sebemin jeńilse, odan keıin Juldyzdar quramasymen 4:4 esebimen teń oınady. Nátıjesinde jartylaı fınalǵa joldama aldy.

Atalǵan týrnırde bas júldege Reseı quramasy qol jetkizdi. Ekinshi oryn Túrkııaǵa buıyrdy.

Aıta ketsek, atalǵan týrnır Reseı astanasy Máskeý qalasynda ótip jatyr.

Bıylǵy jarysqa Qazaqstannan ózge Reseı, Túrkııa, Juldyzdar jáne Brazılııa quramalarynyń burynǵy oıynshylary qatysty.

Atalǵan týrnır 2009 jyldan beri jyl saıyn turaqty túrde ótkizilip keledi.

Sodan beri Reseı quramasy 14 márte chempıondyqqa qol jetkizdi. Tek 2020 jyly Juldyzdar quramasy jeńimpaz tuǵyryna kóterildi.

Foto: vk.com/kuboklegend