Fýtboldan álem chempıonatyndaǵy sýpermatch: Anglııa vs Frantsııa

ASTANA. QazAqparat - Qatarda ótip jatqan fýtboldan 2022 jylǵy álem chempıonatynda búgin, 10 jeltoqsanda jartylaı fınalǵa beriletin tórtinshi joldamany Anglııa men Frantsııa sarapqa salady, dep habarlaıdy QazAqparat tilshisi.

Kezdesý elorda ýaqytymen 1.00-de bastalyp, «Qazaqstan» jáne «Qazsport» telearnalarynan tikeleı efırde kórsetiledi.

Oıyn El-Haýr qalasyndaǵy 68 myń jankúıerge arnalǵan «El-Baıt» stadıonynda ótkiziledi.

Bas tóreshi - brazılııalyq Vılton Sampaıo. Oǵan otandastary Brýno Boshılııa men Brýno Pıres kómekshilik jasaıdy. Qosalqy tóreshi - Birikken Arab Ámirliginen Mohammed Abdýlla Hasan.

FIFA reıtınginde Anglııa – 5, Frantsııa 4-orynda tur.

Eki qurama buǵan deıin 31 márte kezdesti. Onyń 17-de aǵylshyndar, 9-da frantsýzdar basym tússe, qalǵan oıyndar teń nátıjemen aıaqtaldy.

Toptyq kezeńde V tobynda synǵa túsken Anglııa quramasy Irandy 6:2, Ýelsti 3:0 esebimen jeńip, AQSh-pen 0:0 esebimen teń oınady. 1/8 fınalda Senegaldy 3:0 esebimen orta jolda qaldyrdy.

Al D tobynda Frantsııa Avstralııany 4:1, Danııany 2:1 esebimen jeńip, Týnıske 0:1 esebimen jol berdi. Al 1/8 fınalda Polshany 3:1 esebimen qapy qaldyrdy.

Álem chempıonatynda Anglııa on altynshy márte qatysyp otyr. Buǵan deıin 1966 jyly chempıon ataǵyn jeńip aldy.

Frantsııa quramasy on besinshi márte qatysyp otyr. 1998, 2018 jyldarda chempıon atandy.

Aıta ketsek, elorda ýaqytymen 21.00-de Marokko men Portýgalııa kezdesýi «Qazaqstan» jáne «Qazsport» telearnalarynan tikeleı efırde kórsetiledi.

Eske salsaq, Horvatııa Brazılııany jeńip, jartylaı fınalǵa joldama aldy.

Sondaı-aq, Nıderland quramasyn jeńgen Argentına jartylaı fınalǵa shyqty.

Foto: championat.com.