Fýtboldan álem chempıonatynda Germanııa alǵashqy oıynyn ótkizedi

ASTANA. QazAqparat - Qatarda ótip jatqan fýtboldan 2022 jylǵy álem chempıonatynyń tórtinshi oıyn kúninde, 23 qarashada E tobynda eki kezdesý ótedi, dep habarlaıdy QazAqparat tilshisi.

Alǵashqysy Germanııa jáne Japonııa arasynda bolady. Oıyn elorda ýaqytymen 19:00-de bastalyp, «Qazaqstan» jáne «Qazsport» telearnalarynan tikeleı efırde kórsetiledi.

Germanııa quramasy álem chempıonatynyń fınaldyq satysyna 20 márte qatysqaly otyr. Buǵan deıin 1954, 1974, 1990, 2014 jyldarda chempıon atansa, 1966, 1982, 1986, 2002 jyldarda kúmis, 1934, 1970, 2006, 2010 jyldarda qola júldeger boldy.

Olardyń qarsylasy - Japonııa dúbirli dodada jetinshi márte baq synaıdy. Olar 2002, 2010, 2018 jyldarda 1/8 fınalǵa deıin jetti.

Eki qurama úshinshi márte sheberlik baıqasady. Alǵashqy ekeýi joldastyq kezdesý retinde ótkizilgen. 2004 jyly Germanııa 3:0 esebimen jeńiske jetse, 2006 jyly 2:2 esebimen teń tarqasty.

Atalǵan toptaǵy taǵy bir kezdesýde Ispanııa men Kosta-Rıka sheberlik baıqasady. Oıyn elorda ýaqytymen 22:00-de bastalyp, ony «Qazaqstan» telearnasynan tikeleı efırde tamashalaýǵa bolady.

Álemdik fýtbolda ózindik orny bar Ispanııa dúbirli dodaǵa 17 márte keldi. Qazirge deıin 2010 jyly chempıondyq tuǵyrǵa kóterildi.

Al Kosta-Rıka fýtbolshylary aıtýly alamanǵa jetinshi márte qadam basty. Ázirge eń joǵary jetistigi retinde 2014 jyly 1/4 fınalǵa deıin jetkendigin aıtýǵa bolady.

Eki qurama buǵan deıin úsh márte kezdesti. Onyń ekeýinde ıspanııalyq fýtbolshylary basym tússe, bir kezdesý teń nátıjemen aıaqtaldy.

Eske salsaq, S tobyndaǵy Argentına quramasy Saýd Arabııasynan jeńildi.

Sondaı-aq, D tobyndaǵy Danııa men Týnıs quramalary teń tarqasty.

Foto: Alex Grimm / Getty Images Sport