Fýtboldan álem chempıonaty-2022: Ekinshi oıyn kúninde úsh kezdesý ótedi

ASTANA. QazAqparat - Qatarda ótip jatqan fýtboldan 2022 jylǵy álem chempıonatynyń ekinshi oıyn kúninde úsh kezdesý belgilengen, dep habarlaıdy QazAqparat tilshisi.

A tobynda Senegal - Nıderlandy kezdesýi elorda ýaqytymen 22:00- de bastalyp, «Qazsport» telearnasynan tikeleı efırde kórsetiledi.

Senegal quramasy dúbirli dodada bıyl úshinshi márte baq synaýǵa múmkindik alyp otyr. 2002 jyly tuńǵysh márte qatysqanyna qaramastan joǵary nátıjege qol jetkizdi. Sol jyly birinshi oıynda álem chempıony - Frantsııa quramasynan basym túsip, jankúıerlerdi tańǵaldyrǵan edi. Al 2018 jyly toptyq kezeńnen asa alǵan joq.

Al Nıderlandy fýtbolshylary 2018 jyly álem chempıonaty fınaldyq satysynan tys qaldy. Oǵan deıin 10 márte baq synap, 1974, 1978, 2010 jyldary kúmis medal alsa, 2014 jyly úzdik úshtikti túıindedi.

Sondaı-aq, búgin V tobynda birinshi oıyn Anglııa men Iran arasynda bolady. Kezdesý elorda ýaqytymen 19:00-de bastalyp, «Qazaqstan» jáne «Qazsport» telearnalaryna tikeleı efırde kórsetiledi.

Aǵylshyn fýtbolshylary dúbirli dodada bıyl 11 márte baq synamaq. 1966 jyly chempıon atandy. Odan keıin 1990, 2018 jyldarda tórtinshi orynǵa turaqtady. Ázirge budan basqa qol jetken tabysy joq. Al Eýropa chempıonatynda 2020 jyly vıtse-chempıon bolsa, 1968, 1996 jyldarda qola júldege qol sozdy.

Al ırandyq fýtbolshylar ázirge álem chempıonatynda úlken jetistigimen qýanta almaıdy. 1978, 1998, 2006, 2014, 2018 jyldarda toptyq kezeńnen asqan joq.

Atalǵan toptaǵy taǵy bir kezdesý AQSh pen Ýels arasynda elorda ýaqytymen 01:00-de bastalady. Ony «Qazsport» telearnasynan tamashalaýǵa bolady.

Amerıkandyq qurama óz tarıhynda bıyl 11 márte álem chempıonatyna qatysýǵa múmkindik aldy. Ázirge 1930 jyly alǵan qola medal úlken jetistigi retinde baǵalanady. Olar 1990 jyldan beri dúbirli dodaǵa turaqty qatysyp kele jatqan edi. 2018 jyly atalǵan iri jarystan tys qalyp qoıdy. AQSh quramasy 2002 jyly 1/4 fınalǵa deıin jetti.

Al Ýels 1950, 1958 jyldarda álem chempıonaty fınaldyq satysynda baq synady. 1958 jyly 1/8 fınalǵa deıin jetti. Sodan keıin dúbirli dodadan tys qalyp keldi.

Eske salsaq, fýtboldan álem chempıonatynyń alǵashqy oıynynda Qatar quramasy Ekvadordan jeńilip qaldy.

Sondaı-aq, atalǵan kezdesý barysynda ıtalıandyq Danıele Orsato bas tóreshi qyzmetin atqardy.

Foto: azertag.az