Fýtboldan Álem chempıonattary tarıhynda gol sany boıynsha jańa rekord tirkeldi
11:25, 07 Jeltoqsan 2022
ASTANA. QazAqparat - Qatarda ótip jatqan fýtboldan 2022 jylǵy álem chempıonatynyń 1\8 fınalynda 28 gol soǵyldy. Osylaısha mýndıaldyń osy kezeńindegi goldar sany jóninen rekord jańardy. Buǵan deıingi úzdik kórsetkish (26 gol) 1986 jylǵy Meksıkadaǵy álem birinshiliginde tirkelgen edi, dep habarlaıdy QazAqparat tilshisi.
6 jeltoqsanda dúbirli dodanyń 1/8 fınal matchtary máresine jetti. Shırek fınalǵa shyqqan segiz qurama anyqtaldy.
Jarystyń atalǵan satysynda 9 jeltoqsanda Horvatııa men Brazılııa, Nıderland pen Argentına, 10 jeltoqsanda Anglııa men Frantsııa, Marokko men Portýgalııa quramalary sheberlik baıqasady.
Álem chempıonaty pleı-off satysynda eń kóp gol Portýgalııa men Shveıtsarııa (6:1) kezdesýinde tirkeldi. Atalǵan oıynda barlyǵy 7 gol soǵyldy.
Eske salsaq, budan buryn Ispanııa quramasy penaltı tebýden antırekord jasady.
Ispanııalyq fýtbolshylar álem chempıonatynda besinshi márte penaltı serııasyna qatysty. Onyń tórteýinde qarsylastaryna ese jiberdi.
Al Anglııa men Italııa úsh márteden penaltı serııasynda oıdaǵydaı nátıje kórsete almady.
Foto: AlJazeera