Fýtboldan «Aqtóbe» – «Jetisý» matchy kórermensiz ótedi
«Aqtóbe» fýtbol klýbynyń baspasóz qyzmeti Qazaqstan kásipqoı fýtbol lıgasynyń sheshimin jarııalady. Jalpyulttyq aza tutý kúnine baılanysty «Aqtóbe» - «Jetisý» matchyna kórermen kirgizilmeıdi.
«Premer-lıga klýbtary arasyndaǵy QR chempıonatynda 26-týrdyń barlyq matchy kórermensiz ótedi jáne QKFL ánurany oryndalmaıdy, Memlekettik baıraq týtuǵyrdyń ortasyna deıin túsiriledi. Matchtar bastalmas buryn Kostenko atyndaǵy shahtada bolǵan apattan qaza tapqandardy bir mınýt únsizdikpen eske alý uıymdastyrylady. Sondaı-aq barlyq josparlanǵan is-shara (marapattaý rásimderi, utys oıyndary) ótkizilmeıdi. «Aqtóbe» fýtbol klýby Ticketon.kz platformasynda satylǵan bılet quny tolyǵymen keri qaıtarylatynyn habarlaıdy», – dedi baspasóz qyzmetiniń jetekshisi Áset Jomart.
Eske salaıyq, búgin túnde Qaraǵandy oblysyndaǵy Kostenko atyndaǵy shahtada órt boldy. Saǵat 17.33-tegi málimet boıynsha 33 kenshiniń denesi tabyldy,13 adam izdestirilip jatyr.
Keshqurym brıfıng ótkizgen Tótenshe jaǵdaılar mınıstri Syrym Sháriphanov jer astynda qalǵan kenshilerdi tiri tabýǵa úmit óte az ekenin málim etti.
Kásibı áskerılendirilgen apattyq-qutqarý qyzmetteriniń respýblıkalyq ortalyq shtaby Qaraǵandy fılıaly dırektorynyń orynbasary Jumat Ókenov mert bolǵan kenshilerdiń jeke basyn anyqtaý qıynǵa túsip jatqanyn aıtty.
Prezıdent 29 qazandy jalpyulttyq aza tutý kúni etip jarııalaıtyn Ókimge qol qoıdy.
Memleket basshysy Qasym-Jomart Toqaev Úkimetke «ArselorMıttalTemirtaý» kompanııasymen ınvestıtsııalyq yntymaqtastyqty toqtatý týraly tapsyrma berdi. Keıin Úkimettiń baspasóz qyzmeti «ArselorMıttal Temirtaý» AQ-nyń menshik quqyǵyn QR menshigine qaıtarý týraly kelisimsharttyń aıaqtalýǵa jaqyn ekenin málim etti.
Apatqa baılanysty Reseı, Belarýs, Qyrǵyzstan, Frantsııa, Ózbekstan prezıdentteri men Túrkııa Syrtqy ister mınıstrligi kóńil aıtty.