Fýtboldan ÁCh: Portýgalııa Ganany utyp, óz tobynda kósh bastady
Portýgalııa fýtbolshylary bul birinshilikke úlken úmitpen keldi. Ásirese, «Altyn doptyń» bes dúrkin ıegeri, 37 jastaǵy Krıshtıaný Ronaldý úshin bul sońǵy múmkindik deýge bolady. Osyǵan 2016 jylǵy Eýropa chempıonatynda úzdik shyqqan portýgalııalyqtardyń álem birinshilikterinde pálendeı joly bolmaı keledi. Olardyń enshisinde 1966 jylǵy dodanyń qola júldesi ǵana bar. Sondyqtan Fernandý Santýshtyń shákirtteri baryn salatyny anyq.
Bir qyzyǵy, osy aıtýly jarys kezinde aǵylshyndyq «Manchester ıÝnaıted» klýby K.Ronaldýmen kelisimshartty úzgen edi. Sóıtip Krıshtıaný – qazir álem chempıonatyndaǵy klýby joq jalǵyz oıynshy.
Portýgalııa men Gananyń 2014 jyly AQSh-ta ótken álem chempıonatynda joldary toqaılasyp, ekeýi de toptan shyǵa almaǵan edi. Pleı-ofqa onda Germanııa men AQSh joldama aldy. Ózara kezdesýde portýgalııalyqtar ganalyqtardy 2:1 esebimen tize búktirip, jeńis golyn Ronaldý soqqan bolatyn.
Bul joly da birinshi taımda oıyn tizginin birden qolǵa alǵan portýgalııalyqtardyń, sonyń ishinde Krıshtıanýdyń gol soǵatyndaı birneshe múmkindigi boldy.
Ekinshi kezeńde amerıkalyq tóreshi Ismaıl Elfat ganalyq qorǵaýshy Mohammed Salısý Ronaldýdy óz aıyp alańynda shalyp jyqty dep eseptep, 62-mınýtta penaltı belgiledi. Krıshtıaný 11 metrlik núkteden múlt ketken joq – 1:0.
Ganalyqtar da qarap qalmaı, 73-mınýtta sol qaptaldan sýyrylyp shyqqan Mohammed Kýdýstan pas alǵan komanda kapıtany Andre Aııý tarazy basyn teńestirip ketti – 1:1.
Degenmen 78-mınýtta Portýgalııanyń taǵy bir juldyzy Joaý Felıks komandasyn qaıtadan alǵa shyǵardy. Al arada eki mınýt ótkende, alańǵa tyńnan qosylǵan Rafael Leaý esepti 3:1-ge jetkizdi. Bul jerde Brýný Fernandeshtiń qatarynan ekinshi ret nátıjeli pas bergenin aıta ketý kerek. Alaıda 89-mınýtta Abdýl Rahman Baba sol qanatta Joaý Kanselýdi aldap ótip, dál pas berdi. Muny ekinshi taımda oıynǵa qosylǵan Osman Býkarı múlt jibergen joq – 2:3. Ganalyqtar qansha tyrysqanymen, budan árige shamasy jetpedi.
Asa tartysty ótken báseke 3:2 esebimen eýropalyqtardyń paıdasyna sheshildi.
Osylaısha, H tobynda Portýgalııa úsh upaımen kósh bastady. Munyń aldynda teń oınaǵan Ýrýgvaı men Ońtústik Koreıanyń bir-birden upaıy bar. 28 qarasha kúni ótetin Ońtústik Koreıa – Gana, Portýgalııa – Ýrýgvaı matchtary biraz máseleni sheship tastaýy ábden yqtımal.
Eske sala keteıik, budan buryn Ispanııanyń Kosta-Rıkany 7:0 esebimen oısyrata jeńgenin, Belgııanyń Kanada quramasyn qapy qaldyrǵanyn jazǵan bolatynbyz.
Sondaı-aq Ispanııa dopty ustaý jóninen álem chempıonattarynyń rekordyn ornatty.
Ýrýgvaı men Ońtústik Koreıa teń tústi.
Foto: sports.kz