Fýtbol: Joldastyq kezdesýde Qazaqstan quramasy Lıýksembýrgke jol berdi

<p>ASTANA. KAZINFORM - Fýtboldan Qazaqstan quramasy joldastyq kezdesýde Lıýksembýrgke jol berdi. Eki qurama buǵan deıin Ulttar lıgasy pleı-off satysy jartylaı fınalynda qarsylastaryna ese jiberip qoıǵan edi.</p>

Kezdesý qazaqstandyq fýtbolshylar úshin sátti bastaldy. Oıynnyń 2-mınýtynda Ashat Taǵybergenniń áýelete bergen dobyn Ádilet Sádibekov baspen soǵyp, golǵa aınaldyrdy. Bul - jas fýtbolshynyń ulttyq qurama sapynda soqqan alǵashqy goly. Almatylyq «Qaırat» sapynda oınaıtyn qorǵaýshy osylaısha el quramasyn alǵa shyǵarǵan edi.

Dese de, lıýksembýrgtik fýtbolshylar tezirek tarazy basyn teńestirýge umtyldy. Qazaqstan quramasynyń qorǵanys shebindegi oıynshylary jınaqylyq tanytty. Keıbir sátte qaqpashy Igor Shatskıı ábjil qımyl kórsetti. Soǵan qaramastan birinshi kezeńde Lıýksembýrg sapynan Jerson Rodrıgesh 24, Danel Sınanı 45-mınýtta eki gol soǵyp ketti.

Ekinshi kezeńde qazaqstandyq fýtbolshylar tarazy basyn teńestirýge umtyldy. Degenmen kózdegen nysanadan múlt ketip jatty.

Osylaısha Qazaqstan qarsylasyna 1:2 esebimen ese jiberdi.

Eske salsaq, Qazaqstan quramasy Ulttar lıgasy S joly boıynsha pleı-off satysy jartylaı fınalynda Grekııaǵa ese jiberip, 2024 jylǵy Eýropa chempıonaty fınaldyq satysyna shyǵý múmkindiginen aıyryldy.

Al Grýzııa quramasy pleı-off satysy fınalynda Grekııany penaltı serııasynda jeńip, óz tarıhynda tuńǵysh márte qurlyqtyq dodaǵa joldama aldy.