Fýtbol: «Jetisý» «Kaspııden» basym tústi

ASTANA. QazAqparat - Búgin fýtboldan Premer-lıga komandalary arasyndaǵy el birinshiliginiń 12-týrynda taǵy bir oıynnyń nátıjesi belgili boldy, dep habarlaıdy QazAqparat tilshisi.

Bul oıynda Taldyqorǵannyń «Jetisý» komandasy óz alańynda Aqtaýdyń «Kaspııin» qabyldady.

Eki komanda da týrnır kestesiniń ortańǵy bóliginde keledi. Sondyqtan búgingi oıynda ekeýi de jeńiske jetýge kúsh salatyny anyq edi.

Birinshi kezeńde «Kaspıı» sapynan Rýben Brıdjıdo 34, Georgıı Pantsýlaıa 37-mınýtta mergendik tanytty.

Oǵan taldyqorǵandyq klýbtan Ashat Baltabekov 45, Iovan Stoıanovıch 81, 90-mınýtta úsh golmen jaýap berdi.

Osylaısha «Jetisý» qarsylasyn 3:2 esebimen tize búktirdi.

Endi elorda ýaqytymen 20:00-de «Qaısar» men «Maqtaral» kezdesedi.

Eske salsaq, budan buryn «Qaırat» «Oqjetpesten» 2:1 esebimen basym tústi.

Sondaı-aq, «Astana» «Aqsýdy», «Tobyl» «Qyzyljardy» 1:0 esebimen súrindirdi.

Al «Aqtóbe» «Shahterdi» 2:0 esebimen súrindirse, «Ordabasy» «Atyraýdan» 2:1 esebimen basym tústi.