Fýtbol: «Tobyl» óz alańynda «Qaıratqa» jol berdi

ASTANA. QazAqparat - Búgin fýtboldan Premer-lıga komandalary arasyndaǵy el birinshiliginiń 8-týrynda alǵashqy eki oıynnyń nátıjesi belgili boldy, dep habarlaıdy QazAqparat tilshisi.

Atalǵan týrdaǵy negizgi kezdesýdiń biri Qostanaıda «Tobyl» men almatylyq «Qaırat» komandalary arasynda ótti. Eki komanda da týrnır kestesinde qatarlas keledi. Bıyl júldeli oryndardan úmitker. Sondyqtan, ekeýi de jeńiske jetý jolyn izdeıtini anyq edi.

Oıynnyń birinshi kezeńinde «Tobyl» sapynan Jaslan Jumashev 10-mınýtta esep ashty. Oǵan «Qaırat» sapynan Artýr Shýshenachev 55, Joao Paolo 73-mınýtta eki golmen jaýap qaıyrdy. Oıynnyń 90-mınýtynda qostanaılyq klýbtan Islam Chesnokov tarazy basyn teńestirse, 94-mınýtta «Qaırat» oıynshysy Dmıtrıı Sergeev qorytyndy esepti belgiledi.

Nátıjesinde «Tobyl» qarsylasyna 2:3 esebimen jol berdi.

Sondaı-aq, «Aqtóbe» men «Aqsý» (Pavlodar oblysy) kezdesýi aıaqtaldy. Oıyn barysynda aqtóbelik klýbtan Elder Santana 11, Arman Keńesov 56-mınýtta mergendik tanytsa, pavlodarlyq klýbtan Tonı Sılva 62-mınýtta kózdegen nysanadan múlt ketken joq. Osylaısha, «Aqtóbe» qarsylasynan 2:1 esebimen basym tústi.

Dál qazir «Astana» men «Maqtaral» (Túrkistan oblysy) oıyny ótip jatyr. Ázirge esep - 0:0.

Al, 21:00-de «Ordabasy» (Shymkent) men «Qaısar» (Qyzylorda) sheberlik baıqasady.

7 mamyrda «Jetisý» (Taldyqorǵan) men «Oqjetpes» (Kókshetaý), «Kaspıı» (Aqtaý) men «Atyraý», «Shahter» (Qaraǵandy) men «Qyzyljar» (Petropavl) komandalary oınaıdy.