Fýtbol: «Shahter» «Jetisýǵa» ketken esesin qaıtardy

ASTANA. QazAqparat - Búgin fýtboldan Premer-lıga komandalary arasyndaǵy el birinshiliginiń 14-týryndaǵy eki oıynnyń nátıjesi belgili boldy, dep habarlaıdy QazAqparat tilshisi.

Qaraǵandylyq «Shahter» ótken týrda Taldyqorǵannyń «Jetisýyna» 0:1 esebimen ketken esesin qaıtardy.

Bul joly qaraǵandylyq klýb syrt alańda oınaǵanyna qaramastan jınaqy qımyl kórsete bildi.

Nátıjesinde olardyń qatarynan Ivan Svırıdov 41, Roman Mýrtazaev 47, Kampo Mına Frantsısko 73-mınýttarda mergendik tanytsa, «Jetisý» sapynan Aleks Rýshevıch 77-mınýtta kózdegen nysanadan múlt ketken joq.

Osylaısha «Shahter» qarsylasynan 3:1 esebimen basym túsip, týrnır kestesindegi jaǵdaıyn jaqsarta tústi.

Taǵy bir kezdesýde «Aqtóbe» syrt alańda Túrkistan oblysynyń «Maqtaaralyn» 2:1 esebimen jeńip ketti. Oıyn barysynda túrkistandyq klýb sapynan Toqtar Jańǵylyshbaı 32-mınýtta esep ashqan edi. Oǵan «Aqtóbe» sapynan Mılosh Raıchkovıch 45, Nıangbo Frank Anderson 56-mınýtta eki golmen jaýap qaıyrdy.

Ótken týrda komandalar 1:1 esebine qanaǵat bildirdi.

Endi 21:00-de «Qaısar» (Qyzylorda) men «Oqjetpes» (Kókshetaý) sheberlik baıqasady.

2 shildede «Tobyl» (Qostanaı) men «Atyraý» (Almaty), «Ordabasy» (Shymkent) men «Aqsý» (Pavlodar oblysy) kezdesedi.

Sondaı-aq, 2 shildede 13-týrdyń eki oıynynda «Qyzyljar» (Petropavl) pen «Qaırat» (Almaty), «Kaspıı» (Aqtaý) men «Astana» oınaıdy.