Fýtbol: Ronaldýdyń ornyna shyǵyp, het-trık jasaǵan fýtbolshy kim

ASTANA. QazAqparat – Qatarda fýtboldan ótip jatqan álem chempıonatynda Portýgalııa - Shveıtsarııa matchynda Krıshtıaný Ronaldýdyń ornyna shyqqan Gonsalý Ramýsh het-trıktiń avtory atandy, dep habarlaıdy QazAqparat tilshisi.

«Benfıka» (Lıssabon) klýbynyń shabýylshysy, 21 jastaǵy G.Ramýsh aıdy aspanǵa shyǵaryp, matchtyń úzdik oıynshysy boldy.

Osynaý tabysyna matchtan keıin Ramýshtyń ózi de tańdanysyn bildirdi. Ol sondaı-aq qurama kapıtany Krıshtıanýdyń barlyq oıynshylarmen birdeı aralasatynyn, kimge bolsa da, kómek kórsetýge daıyn turatynyn jetkizdi.

Pleı-ofqa deıin Ramýsh álem chempıonatynda tek 10 mınýtqa alańǵa shyqqan. Ganamen ótken matchta 2, Ýrýgvaımen básekede 8 mınýt qana oıynda bolǵan.

Ramýsh – ataqty Eısebıodan keıin pleı-ofta bir doptan artyq gol soqqan birinshi portýgalııalyq fýtbolshy.

G.Ramýsh 17, 18, 19, 20 jáne 21 jasqa deıingiler arasynda Portýgalııa quramasy sapynda oınady. 2019 jyly shildede 19 jasqa deıingiler arasynda Eýropa chempıonatynda tórt golmen úzdik surmergen atandy.

Bıyl qyrkúıek aıynda Ulttar lıgasynda Chehııa jáne Ispanııamen ótken oıyndarǵa shaqyrtý alǵanymen, alańǵa shyqqan joq. 17 qarasha kúni Nıgerııamen joldastyq kezdesýde Andre Sılvany almastyryp, ulttyq qurama sapyndaǵy alǵashqy golyn soqty.

Portýgalııanyń ońtústiginde ornalasqan Olıan qalasynda týyp-ósken Gonsalý – «Farense» klýbynyń burynǵy oıynshysy Manýel Ramýshtyń uly. Ákesiniń arqasynda fýtbolǵa degen qyzyǵýshylyǵy oıanǵan G.Ramýsh 13 jasynda «Benfıka» akademııasyna qabyldanyp, sodan keıin-aq jasyl alańda jarqyldaı bastady. Al Shveıtsarııamen ótken matchtaǵy het-trıkten keıin G.Ramýsh tanymal oıynshyǵa aınaldy.

Eske sala keteıik, budan buryn Marokkonyń sensatsııa jasap, 1/8 fınalda Ispanııany jeńip ketkenin jazǵan bolatynbyz.

Sondaı-aq Portýgalııa fýtbolshysy pleı-off kezeńinde gol soqqan eń saqa oıynshy atandy.

Shveıtsarııany oısyrata utqan Portýgalııa shırek fınalǵa shyqty.

Foto: DMITRII GOLÝBOVICh, «ChEMPIONAT»