Fýtbol: «Ordabasy» syrt alańda «Aqsýdan» basym tústi

ASTANA. QazAqparat - Búgin fýtboldan Premer-lıga komandalary arasyndaǵy el birinshiliginiń 13-týrynyń alǵashqy oıyn kúni máresine jetti, dep habarlaıdy QazAqparat tilshisi.

Alǵashqy kúngi oıyndardy «Aqsý» men «Ordabasy» komandalary túıindedi.

Kezdesý taǵdyryn 66-mınýtta shymkenttik klýbtan Vladıslav Vasılev soqqan jalǵyz gol sheshti. Nátıjesinde «Ordabasy» qarsylasyn 1:0 esebimen tize búktirdi. Qatarynan altynshy márte jeńiske jetip, týrnır kestesinde ekinshi orynǵa myqtap ornyqty.

Al «Aqsý» sońǵy on oıynnyń toǵyzynda jeńilip, bireýinde ǵana qarsylasynan basym tústi. Týrnır kestesinde sońǵy orynda tur.

Sondaı-aq, «Astana» «Kaspııdi» 3:1 esebimen jeńse, «Qaırat» «Qyzyljardy» 3:0 esebimen tize búktirdi.

Al odan keıin «Atyraý» «Tobyldy», «Jetisý» «Shahterdi» qapy qaldyrdy.