Fýtbol: «Oqjetpes» segiz oıyn boıy jeńiske jete almaı keledi

ASTANA. QazAqparat - Búgin fýtboldan Premer-lıga komandalary arasyndaǵy el birinshiliginiń 13-týrynda qyzylordalyq «Qaısar» Kókshetaýdyń «Oqjetpesin» qapy qaldyrdy, dep habarlaıdy QazAqparat tilshisi.

Eki komanda elordadaǵy «Astana-arena» stadıonynda kezdesti. Kókshetaýdaǵy stadıonnyń daıyn bolmaýyna baılanysty «Oqjetpes» óz alańyndaǵy oıyndaryn elordada ótkizýge májbúr.

Kezdesý barysynda komandalar bir-biriniń qaqpasyna gol soǵýǵa tyrysty. Dese de birinshi kezeńde esep ashylǵan joq.

Oıynnyń 56-mınýtynda «Qaısar» sapynan Ádilet Keńesbek qarsylastar qaqpasyn dál kózdep, óz komandasyna jeńis syılady.

Osylaısha, «Qaısar» kókshetaýlyq komandany 1:0 esebimen tize búktirdi. Nátıjesinde týrnır kestesinde 19 upaımen jaǵdaıyn jaqsartyp aldy.

Esesine segiz oıyn boıyna jeńiske jete almaı kele jatqan «Oqjetpes» týrnır kestesiniń tómengi bóliginde qalyp qoıdy.

Aıta ketsek, dál qazir «Aqtóbe» men «Maqtaral» kezdesýi ótip jatyr. Ázirge esep - 0:0.

Sondaı-aq, «Astana» «Kaspııdi» 3:1 esebimen jeńse, «Qaırat» «Qyzyljardy» 3:0 esebimen tize búktirdi. Al odan keıin «Atyraý» «Tobyldy» 3:0, «Jetisý» «Shahterdi», «Ordabasy» «Aqsýdy» 1:0 esebimen qapy qaldyrdy.