Fýtbol: «Maqtaral» qatarynan eki márte jeńiske jetti

ASTANA. QazAqparat - Búgin fýtboldan Premer-lıga komandalary arasyndaǵy el birinshiliginiń 12-týry máresine jetti, dep habarlaıdy QazAqparat tilshisi.

Bul oıynda Qyzylordanyń «Qaısary» óz alańynda Túrkistan oblysynyń «Maqtaralyn» qabyldady.

Qyzylordalyq klýb sońǵy bes kezdesýdiń ekeýinde ǵana jeńiske jetti. Sondyqtan búgin qarsylasyn qapy qaldyrǵan jaǵdaıda úzdik úshtikte turǵan komandalarǵa jaqyndaýǵa múmkindik alatyn edi.

Kezdesý barysynda alań ıeleri alǵashqy mınýttan gol soǵatyn múmkindikti izdedi. Degenmen oǵan túrkistandyq komanda qorǵaýshylary laıyqty toıtarys bere bildi. Esesine olardyń qatarynan Ramazan Kárimov 42, Seký Dýmbııa 95-mınýtta eki gol soǵyp ketti.

Osylaısha «Maqtaral» 2:0 esebimen basym tústi. Nátıjesinde qatarynan eki márte jeńiske jetti. Olar budan buryn almatylyq «Qaıratty» tize búktirgen edi.

Al týrnır kestesinde «Maqtaral» sońǵy orynda tur.

Eske salsaq, budan buryn «Qaırat» «Oqjetpesten» 2:1 esebimen basym tústi.

Sondaı-aq, «Astana» «Aqsýdy», «Tobyl» «Qyzyljardy» 1:0 esebimen súrindirdi.

Al «Aqtóbe» «Shahterdi» 2:0 esebimen súrindirse, «Ordabasy» «Atyraýdan» 2:1 esebimen basym tústi.