Fýtbol: «Qaısar» qatarynan úshinshi márte jeńiske jetti

ASTANA. QazAqparat - Fýtboldan Premer-lıga komandalary arasyndaǵy el birinshiliginiń 6-týrynda taǵy eki oıynnyń nátıjesi belgili boldy, dep habarlaıdy QazAqparat tilshisi.

Eki oıynnyń birinde Taldyqorǵannyń «Jetisýy» óz alańynda Qyzylordanyń «Qaısaryn» qabyldady.

Kezdesý barysynda komandalar alǵashqy mınýttan gol soǵatyn múmkindikti izdedi. Degenmen olar dittegen maqsatyna jete almaı jatty. Oıynnyń 45-mınýtynda «Jetisý» qaqpasyna belgilengen penaltıden «Qaısar» oıynshysy Dmıtrıı Borodın múlt ketken joq.

Ekinshi kezeńde alań ıeleri esepti teńestirýge umtyldy. Esesine óz qaqpasy mańynda taǵy da tártip buzyp, 79-mınýtta penaltı belgilendi. Bul joly da Dmıtrıı Borodın qaqpa toryn týlatty.

Osylaısha «Qaısar» qarsylasynan 2:0 esebimen basym tústi. Nátıjesinde qatarynan úshinshi márte jeńiske jetip, týrnır kestesinde besinshi orynǵa kóterildi.

Taǵy bir kezdesýde Qaraǵandynyń «Shahteri» óz alańynda Túrkistan oblysynyń «Maqtaralymen» sheberlik baıqasty. Qaraǵandylyq klýb birde-bir márte jeńiske jete almaı, nebári bir upaıdy qanaǵat tutty. Al «Maqtaral» bir jeńispen týrnır kestesinde tómengi orynda turdy.

Kezdesý barysynda «Shahter» sapynan ıÝrıı Pertsýh 30, Ivan Svırıdov 37, Egor Alıshaýskas 41-mınýttarda mergendik tanytty.

Qaraǵandylyq klýb qarsylasyn 3:0 esebimen jeńip, birinshiliktegi alǵashqy jeńisine qol jetkizdi.

Qazirge deıin atalǵan týrda «Kaspıı» bıylǵy birinshilikte alǵash ret jeńiske jetti.

Endi 16 sáýirde «Aqsý» men «Qyzyljar», «Aqtóbe» men «Atyraý», «Astana» men «Qaırat», «Ordabasy» men «Tobyl» oınaıdy.

Eske salsaq, besinshi týrdan keıin «Qyzyljar» komandasy kósh bastap keledi.