Fýtbol: «Qaısar» alǵashqy jeńisine qol jetkizdi

ASTANA. QazAqparat - Búgin fýtboldan Premer-lıga komandalary arasyndaǵy el birinshiliginiń 4-týrynyń alǵashqy oıyny ótti, dep habarlaıdy QazAqparat tilshisi.

Tórtinshi týrdyń alǵashqy oıynynda Aqtaýdyń «Kaspıı» komandasy Qyzylordanyń «Qaısary» kezdesti. Aqtaýdaǵy stadıonnyń daıyn bolmaýyna baılanysty oıyn Almaty qalasyndaǵy «Jas Qyran» stadıonynda ótkizildi.

Qazirge deıin komandalar týrnır kestesinde tómengi oryndarda kele jatqan edi. Aqtaýlyq ujym úsh týrda birde-bir upaıǵa qol jetkize alǵan joq. Al qyzylordalyq klýbtyń enshisinde nebári bir ǵana upaı boldy.

Oıyn basynan qos komanda birden shabýylǵa kóbirek shyǵýǵa kóńil bóldi. Kóp sátte «Qaısar» oıynshylarynyń belsendiligi baıqaldy. Nátıjesinde olardyń qatarynan 27, 32-mınýttarda Vasılıı Sovpel eki márte mergendik tanytty.

Oıynnyń 54-mınýtynda qyzylordalyq klýbtan Baqdáýlet Zýlfıkarov esepti ústemeleı tústi. Al 63-mınýtta «Kaspıı» sapynan Alekseı Zaleskı penaltıden múlt ketken joq.

Osylaısha «Qaısar» qarsylasynan 3:1 esebimen basym túsip, bıylǵy birinshiliktegi alǵashqy jeńisine qol jetkizdi. Týrnır kestesinde olar segizinshi orynǵa kóterilse, aqtaýlyq klýb sońǵy orynǵa syrǵydy.

Endi tórtinshi týrda búgin 16:00-de «Shahter» (Qaraǵandy) men «Qaırat» (Almaty) kezdesse, 18:00-de «Aqsý» (Pavlodar oblysy) men «Maqtaral» (Túrkistan oblysy) oıyny belgilengen.

Al 2 sáýirde «Jetisý» men «Tobyl», «Aqtóbe» men «Qyzyljar», «Atyraý» men «Oqjetpes», «Astana» men «Ordabasy» oınaıdy.