Fýtbol qaqpasy qulap, balanyń qaıtys bolýy boıynsha sotqa deıingi tergeý bastaldy

ASTANA. QazAqparat – Fýtbol oıyny kezinde 10 jasar balanyń basyna qaqpa qulap, oqıǵa ornynda qaıtys bolýyna baılanysty sotqa deıingi tergeý bastaldy, dep habarlaıdy QazAqparat tilshisi qalalyq polıtsııa departamentiniń baspasóz qyzmetine silteme jasap.

«7 tamyzda polıtsııaǵa mektep alańynda fýtbol oınap júrgen balanyń basyna temir konstrýktsııa qulap, saldarynan onyń sol jerde qaıtys bolǵany týraly habarlama tústi. Atalǵan fakti boıynsha Baıqońyr aýdandyq polıtsııa basqarmasy Qylmystyq kodekstiń 306-baby boıynsha qaýipsizdik talaptaryna saı kelmeıtin jumystardy oryndaýǵa jáne qyzmet kórsetýge qatysty sotqa deıingi tergeý amaldaryn bastady», - delingen habarlamada.

Sondaı-aq, elorda polıtsııasynan QR Qylmystyq-protsestik kodeksiniń 201-babyna sáıkes, ózge málimetter jarııa etýge jatpaıtyny eskertildi.

Eske salsaq, keshe Astanadaǵy mektepte oqýshynyń ústine fýtbol qaqpasy qulap, 10 jasar bala mert bolǵany týraly habarlaǵan edik. Bilim basqarmasynyń aqparatyna sáıkes, oqıǵa №10 mekteptiń aýmaǵynda bolǵan. Bala alǵan jaraqatynan sol jerde kóz jumǵan.