ASTANA. QazAqparat - Kongo quramasynyń shabýylshysy Jýnıor Kabananga «Astana» sapynda qaıtadan oınaıtyn bolady, dep habarlaıdy QazAqparat tilshisi.
Saýd Arabııasynyń «Al Nasr» (Er-Rııad) klýbynyń Tvıtterdegi paraqshasynda jazylǵanyndaı, Kabananga «Astanaǵa» jalǵa berilmekshi.
Bıyl 29-ǵa tolǵan Kabananga astanalyq klýb sapynda 2015-2017 jyldary óner kórsetip, úsh márte el chempıony bolyp úlgerdi. Komanda surmergenderiniń birine aınalǵan ol premer-lıgadaǵy 57 matchta 29 gol soqty.
Bıylǵy aqpan aıynda kongolyq shabýylshy «Al-Nasr» klýbyna aýysyp, 2,5 jylǵa kelisimshartqa otyrǵan bolatyn.
Eske sala keteıik, keshe Eýropa chempıondary lıgasynyń birinshi irikteý saıysynda «Astana» óz alańynda Chernogorııanyń «Sýteska» komandasyn 1:0 esebimen jeńgen bolatyn.
Aldaǵy ýaqytta aldyńǵy shepte oıqastap, mergendigimen tanyla alatyn Kabanangadaı kánigi, uzyn boıly shabýylshynyń kerek ekendigi anyq.
Ǵaısaǵalı Seıtaq
1980 jyly A. Pýshkın atyndaǵy Oral pedagogıkalyq ınstıtýtyn (M. Ótemisuly atyndaǵy BQÝ) qazaq tili men ádebıeti mamandyǵy boıynsha bitirgen. Tasqala aýdandyq «Ekpin» gazetinde tilshi, bólim meńgerýshisi boldy. Oblystyq «Oral óńiri» gazetinde tilshilikten bas redaktorlyqqa deıingi joldan ótti. «Jaıyq Press» JShS bas dırektorynyń birinshi orynbasary qyzmetin atqardy. 2000 jyldan beri Kazinform halyqaralyq aqparat agenttiginiń BQO-daǵy menshikti tilshisi. Qazaqstan Jazýshylar jáne Jýrnalıster odaǵynyń múshesi. Respýblıkalyq «Jalyn» jýrnaly belgilegen Tólegen Aıbergenov atyndaǵy syılyqtyń (1987) jáne sport jýrnalısteri arasynda Seıdahmet Berdiqulov atyndaǵy syılyqtyń laýreaty (2015). «Eren eńbegi úshin» medaliniń ıegeri. Halyqaralyq «Alash» ádebı syılyǵynyń laýreaty (2024).