Fýtbol federatsııasynyń jańa prezıdenti qashan saılanady – mınıstr jaýap berdi

<p>ASTANA. KAZINFORM &ndash; QR Týrızm jáne sport mınıstri Erbol Myrzabosynov Qazaqstan fýtbol federatsııasynyń jańa prezıdentin tańdaýǵa qatysty pikir bildirdi.</p>

«Qazir ár federatsııamen tyǵyz baılanysta jumys istep jatyrmyz. Federatsııalardyń daıyndyq jospary, jol kartasy, óńirlerde balalardyń fýtbolmen aınalysýy baǵyttaryn pysyqtaımyz. Fýtbol federatsııasyna toqtalsaq, Ádilet Barmenqulov federatsııa prezıdenttiginen óz erkimen ketemin degennen keıin, biz oǵan eshqandaı qarsylyq tanyta almaımyz», - dedi E. Myrzabosynov Parlament Májilisiniń jalpy otyrysynan keıin tilshiler suraǵyna jaýap bere otyryp.

Onyń aıtýynsha, qazir atalǵan federatsııa basshylyǵyna kim keletini belgisiz.

«Fýtbol federatsııasy – óziniń atqarýshy komıteti bar qoǵamdyq birlestik. Ázirge, tıisti protsedýralar atqarylyp jatyr jáne kim keletini belgisiz. Qalaı bolǵanda da, barlyq úmitkerge tolyq taldaý jasalady. Bir aıdan keıin qorytyndy konferentsııa ótip, onda kandıdattar jarııalanady. Onyń músheligindegi barlyq aımaqtar jańa prezıdentti saılaıdy. Biz de úmitkerdi tańdaýǵa qatysamyz», - dedi mınıstr.

Budan buryn habarlanǵandaı, jaqynda Qazaqstan fýtbol federatsııasynyń baspasóz qyzmeti Ádilet Barmenqulovtyń federatsııa prezıdenttiginen ketkenin rastady. 

Aıta keteıik, búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine dene shynyqtyrý jáne sport, sondaı-aq normalardyń artyq zańnamalyq reglamenttelýin boldyrmaý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy. 

Qujat aıasynda sport federatsııalarynyń qyzmeti de ózgeredi.