Frıstaılshy Marjan Aqjigit Olımpıadadaǵy sátsiz ónerin túsindirdi

PHENChHAN. QazAqparat - Ońtústik Koreıanyń Phenchhan qalasynda ótip jatqan Olımpıada oıyndarynda frıstaıl-akrobatıkadan el namysyn qorǵaǵan qyzdarymyzdyń biri Marjan Aqjigit jarystan keıingi áserimen bólisti, dep habarlaıdy QazAqparat tilshisi.

"Jarys óte joǵary deńgeıde ótip jatyr. Biraq, bul meniń birinshi Olımpıadam, sondyqtan qobaljý boldy. Jaqsy nátıje kórsete almadym. Esesine, úlken tájirıbe aldym. 17 jasqa jańa tolyp jatyrmyn. Bolashaǵym alda dep oılaımyn. Endi, tórt jyldan keıin keletin oıyndarda júldege talasatyn bolamyn. Bul joly ata-anam, elim túsinistikpen qaraıdy dep úmittenemin. Kileń myqtylarmen saıysqa shyqtyq. Kelesi Olımpıadada osyndaı nátıjege qol jetkizsem onyń jóni basqa bolady" - dedi jas sportshy Marjan Aqjigit.

Sondaı-aq ol barlyq týǵan týystary men oǵan qoldaý bildirgen barsha qazaqstandyqtarǵa alǵysyn bildirdi.

"Barlyq týystarym, áke-sheshem, men sizderdi saǵyndym. Barlyqtaryńyzǵa Aq Olımpıada alańynan sálem joldaǵym keledi. Dostarym, meni qoldap jatqandaryńyz úshin sizderge de rahmet", - dedi ol.

Esterińizge sala keteıik, búgin Marjan Aqjigit frıstaıl-akrobatıkadan synǵa tústi. Іrikteý kezeńinde qatelikterge boı aldyryp, jarystyń kelesi mejesine ótpeı qaldy.