Frantsýz ınvestory Jambyl oblysynda qýaty 1 GVt bolatyn jel elektr stansasyn salady

<p>Májilis Qazaqstan men Frantsııa Úkimeti arasyndaǵy jahandyq jylynýǵa qarsy kúres salasyndaǵy yntymaqtastyqty iske asyrý týraly arnaıy kelisimdi ratıfıkatsııalaıtyn zańdy qabyldady. Kelisim aıasynda Jambyl oblysynda qýaty 1 GVt bolatyn jel elektr stansasyn salý kózdelgen, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Arnaıy kelisimniń maqsaty – Qazaqstan aýmaǵynda jańartylatyn energııa kózderin ornyqty damý salasyndaǵy iri jobalardy ázirlep, iske asyrý. Kelisim sheńberinde Jambyl oblysyndaǵy Mırnyı kentiniń mańynda jalpy qýaty 1 GVt jel energııasyn paıdalanatyn jel elektr stantsııasynyń jobasyn salý josparlanǵan. Jobany iske asyrý 2030 jylǵa qaraı jańartylatyn energııa kózderiniń energetıka júıesindegi úlesin 15%-ǵa qol jetkizýdi kózdeıtin ındıkatorlarǵa qol jetkizýge, sondaı-aq jyl saıynǵy kómirqyshqyl gazynyń shyǵaryndysyn qysqartýǵa múmkindik beredi», - dedi qujatty tanystyrǵan Energetıka mınıstri Almasadam Sátqalıev.

Onyń sózinshe, joba aıasynda 250-ge deıin turaqty jumys orny, 2500-ge deıin ýaqytsha jumys orny qurylmaq.

Shamamen 820 mıllıard teńge ınvestıtsııa tartylyp, qosymsha 3,6 mlrd kVt/saǵ jasyl energııa óndirilmek.

«Ózderińiz biletindeı, qazirgi tańda Eýropa elderi kómirtegi salyǵyn engizý baǵytynda jumys istep jatyr. Jasyl energııa generatsııalaıtyn qosymsha qýattardy engizý qazaqstandyq taýarlardyń halyqaralyq naryqtaǵy básekege qabilettiligine oń áserin tıgizedi», - dedi Energetıka mınıstri.

Vedomstvo basshysy joba ınvestordyń qarajaty esebinen iske asatynyn atap ótti.

Depýtattar kelisimdi ratıfıkatsııalaý jóninde sheshim qabyldady.