Frantsýz damý agenttigi Aral mańyndaǵy mektepterge 2,4 mln eýro bólmekshi

<p>ASTANA. KAZINFORM &ndash; Senat depýtattary Frantsýz damý agenttiginiń Qazaqstandy qoldaýǵa baǵyttalǵan josparyn ratıfıkatsııalaýǵa arnalǵan zańdy maquldady.</p>

Qujatty tanystyrǵan senator Bıbigúl Jeksenbaı atalǵan kelisimge Frantsııa Prezıdenti Emmanıýel Makronnyń Qazaqstanǵa 2023 jyly jasaǵan memlekettik sapary kezinde qol qoıylǵanyn eske saldy.

- Kelisimniń maqsaty - Frantsýz damý agenttigi tobynyń Qazaqstandaǵy qyzmetiniń quqyqtyq, salyqtyq jáne qarjylyq sharttaryn aıqyndaý. Bul uıym 115 elde 4000-nan astam jobany júzege asyryp keledi. Kelisimde Frantsýz damý agenttiginiń Qazaqstan Respýblıkasyndaǵy quqyqtyq mártebesi jáne ruqsat etilgen qyzmet túrleri aıqyndalǵan, - dedi depýtat Senat otyrysynda.

Frantsýz damý agenttigi memlekettik jáne jeke kompanııalarǵa 15 jylǵa deıingi uzaq merzimdi qaryzdar berý arqyly qoldaý kórsetedi.

- Frantsýz damý agenttigi densaýlyq saqtaý salasynda 945 myń eýro, Balqash kóliniń josparyna 1,3 mln eýro, Aral basseıni óńiriniń mektepterinde bilim berý is-sharalaryna 2,4 mln eýro grant retinde bólýdi josparlap otyr. Tehnıkalyq járdemdesý sheńberinde Frantsýz damý agenttigi Aqtaý portyn keńeıtý jáne Qazaqstannyń ońtústiginde elektr jelilerin salý sııaqty birneshe jobalardy da qarastyryp jatyr, - dedi Bıbigúl Jeksenbaı.

Osyǵan deıin Senat Joǵarǵy sottyń sýdıalaryn qyzmetinen bosatqanyn habarladyq.

/