Frantsııa prokýrorlary Le Pendi qamaýǵa alýdy talap etti

<p>ASTANA.KAZINFORM &mdash; Parıj prokýratýrasy &laquo;Ulttyq birlestik&raquo; partııasynyń is júzindegi jetekshisi Marın Le Pendi bes jylǵa bas bostandyǵynan aıyrýǵa úkim shyǵarýdy, sondaı-aq oǵan sol merzim ishinde memlekettik qyzmet atqarýǵa tyıym salýdy talap etti, dep jazady <a href="https://t.me/dwglavnoe/46106" target="_blank" rel="noopener">DW</a>.</p>

Eger sot aıyptaýmen kelisse, 56 jastaǵy Le Pen 2027 jyly Frantsııa prezıdentiniń saılaýyna qatysa almaıdy. Aıyptaýshylar sonymen qatar partııaǵa eki mıllıon eýro aıyppul salýdy talap etti.

Le Pen men Ulttyq birlestiktiń basqa 20-dan astam ókili Eýroodaq qarajatyn maqsatsyz paıdalandy dep aıyptalyp otyr. Aıyptaý tarapynyń aıtýynsha, saıasatker zańsyz «júıeni» basqarǵan, onda Eýroparlament depýtattarynyń kómekshisi bolyp jumysqa ornalasqan jáne sol úshin jalaqy alatyn adamdar is júzinde Le Penniń ózi nemese onyń partııasy úshin jumys istegen. Jalpy shyǵyn shamamen 7 mıllıon eýrony quraıdy.

Prokýrorlar advokattar apellıatsııalyq shaǵym túsirse de, memlekettik qyzmette bolýǵa tyıym salý dereý kúshine enýin talap etti. Le Penniń ózi prokýrorlardy «frantsýz halqyn qalaǵan adamǵa daýys berý múmkindiginen aıyrýǵa» umtyldy dep aıyptady.

- Men eshqandaı zań buzýshylyq nemese zańsyz áreket jasadym dep oılamaımyn, — dedi ol.

Buǵan deıin habarlaǵanymyzdaı, saýalnamalar frantsýz ońshyl kóshbasshysy Marın Le Penniń prezıdenttik saılaýda jeńiske jetýge burynǵydan da jaqyn ekenin kórsetti. Degenmen, jalǵasyp jatqan protsess M.Le Pendi 2027 jyly prezıdenttik saılaýǵa túsý múmkindiginen aıyrýy múmkin.