Frantsııa Lıvandy qoldaý úshin 100 mıllıon eýro bóledi

<p>ASTANA. KAZINFORM &ndash; Frantsııa Lıvanǵa qoldaý kórsetý úshin 100 mıllıon eýro (108 mıllıon AQSh dollary) kóleminde kómek bólmekshi. Bul týraly Frantsııa prezıdenti Emmanýel Makron Parıjde ótken Lıvanǵa kómek kórsetý jónindegi halyqaralyq konferentsııada aıtty, dep habarlaıdy Kazinform <a href="https://www.inform.kz/ru/frantsiya-videlit-100-millionov-evro-na-podderzhku-livana-4ebb72" target="_blank" rel="noopener">tilshisi</a>.</p>

Makron «qysqa merzimdi perspektıvada Lıvan halqyna, soǵys saldarynan qonys aýdarǵan júzdegen myń adamdarǵa da, olardy qabyldaǵan qaýymdastyqtarǵa da aýqymdy kómek qerek» dedi.

«Hezbolla» men Izraıl arasyndaǵy soǵys bir mıllıon lıvandyqty el ishinde qonys aýdarýǵa májbúrledi, 2500-den astam adamnyń ómirin qıdy sondaı-aq ekonomıkalyq daǵdarysty tereńdete tústi.

Óz kezeginde Lıvan premer-mınıstriniń mindetin atqarýshy Nadjıb Mıkatı konferentsııada Lıvan armııasyn nyǵaıtý jáne keńeıtý, sondaı-aq eldiń qıraǵan ınfraqurylymyn qalpyna keltirý úshin halyqaralyq qoldaý qajet bolatynyn aıtty.

Mıkatı Lıvan úkimetiniń atysty toqtatý jónindegi kelisimi men Lıvannyń ońtústigine armııa ornalastyrýdy talap etetin BUU Qaýipsizdik Keńesiniń qararyn oryndaý josparynyń bir bóligi retinde qosymsha ásker tartýǵa sheshim qabyldaǵanyn jáne 8 myń sarbaz jibere alatynyn aıtty.

Búgin Frantsııa astanasynda Lıvanǵa kómek kórsetý jónindegi halyqaralyq konferentsııa ótip jatyr.

Frantsııa Syrtqy ister mınıstri Jan-Noel Barro keshe sharaǵa 70-ke jýyq el men 15 halyqaralyq uıymnyń qatysatynyn aıtyp, Frantsııa «Lıvandy jerge qaratpaıdy» dep ýáde berdi.

«Biz shaqyrǵan elderdiń bári kelisimin berdi», - dedi ol shaqyrylǵan qatysýshy elderdiń tizimine silteme jasaı otyryp. Oǵan Iran men Izraıl kirgen joq.

Frantsýz uıymdastyrýshylary qatysýshylardyń qarjylyq kepili BUU baǵalaýy boıynsha shuǵyl qajet 426 mıllıon dollardy jınaıdy dep úmittenedi.

Parıj sondaı-aq Lıvannyń egemendigin qalpyna keltirýge jáne onyń ınstıtýttaryn nyǵaıtýǵa kómektesýge daıyn ekenin habarlady.