Fransýa Olland tabıǵı resýrstar baǵasynyń turaqtylyǵyn qamtamasyz etýge shaqyrdy

ASTANA. QazAqparat - Frantsııanyń eks-prezıdenti Fransýa Ollandtyń paıymynsha, álemdik ekonomıkany damytý úshin tabıǵı resýrstardyń baǵalarynyń turaqtylyǵyn qamtamasyz etý kerek. Bundaı pikirdi ol Astana ekonomıkalyq forýmynda aıtty, dep habarlaıdy QazAqparat tilshisi.

«Biz bank salasynda qıyn jaǵdaı týyndaǵan kezdegi ekonomıkalyq daǵdarysty este saqtaýymyz kerek. Árıne, osynyń barlyǵy jetkilikti pysyqtalmaǵan qadamdarǵa baılanysty bolýy múmkin nemese bul máselege laıyqty sheshim jasalmady. Sonymen qatar tabıǵı resýrstar baǵasynyń quldyraýyn, onyń ishinde munaı baǵasynyń tómendeýin nazarǵa alý kerek», - dep toqtaldy F. Olland.

Frantsııanyń eks-prezıdenti ekonomıkalyq daǵdarys álemniń barsha óńirin sharpyǵanyn, bul óz kezeginde saýda jáne qarjylyq qatynastar salasyndaǵy talaptardy qataıta túsýge yqpal etkendigin atap ótti.

«Nátıjesinde, barsha álem úshin qolaısyz saldardyń týyndaǵanyn kórip otyrmyz. Sáıkesinshe, táýekelder jekelegen elderde de baıqalýda. Osyǵan oraı búginde tıisti saıası sheshimderdiń qabyldanýyn kútýdemiz. Osy saıası sheshimderdiń keıbirin biz qazirgi kezde ózimizdiń memleketterimizdiń aıasynda qabyldaýymyz qajet. Nemese olardy jahandyq bastamalar aıasynda dáleldegen jón. Atap aıtqanda, ekonomıkalyq, qarjylyq, kommertsııalyq salalardaǵy erejelerde turaqtylyqty usyný kerek. Satyp alý qabilettligi úshin baǵalar turaqtylyǵy qajet, ásirese tabıǵı resýrstar men shıkizattyń baǵasy turaqty bolǵany abzal. Munymen qosa, saýda jasaý erejelerin de ońtaılandyrý kerek. Sebebi búginde osyndaı múmkindikter eskerilmegen», - dep túıdi Fransýa Olland.