Frantsııanyń mashına jasaý kompanııasy Qazaqstanǵa taǵy 100 mln eýroǵa deıin quıýǵa daıyn

ASTANA. QazAqparat – QR Premer-Mınıstri Álıhan Smaıylov pen Alstom kompanııasynyń Afrıka, Taıaý Shyǵys jáne Ortalyq Azııa óńirleri boıynsha prezıdenti Endrıý DeLeone frantsýz mashına jasaý kompanııasynyń Qazaqstandaǵy qyzmetin keńeıtý máselelerin talqylady. QazAqparat bul týraly primeminister.kz saıtyna silteme jasap habarlaıdy.

Premer-Mınıstr elektrovozdar men oǵan quramdas bólshekter óndiretin Alstom kompanııasy Qazaqstandaǵy temirjol ónerkásibin jańǵyrtý baǵdarlamasynyń negizgi qatysýshylarynyń biri ekenin atap ótti.

Sonymen qatar kompanııa quzyrettilik ortalyq retinde de qyzmetin damytýda, nátıjesinde bizdiń elimizde biliktiligi joǵary ınjenerlerdiń jańa býyny qalyptasyp keledi. Qazaqstan Úkimeti Alstom kompanııasymen uzaq merzimdi yntymaqtastyqty jalǵastyrýǵa daıyn

, — dedi Álıhan Smaıylov.

Úkimet basshysynyń aıtýynsha, respýblıkada ınvestorlar úshin salyqtyq jáne kedendik jeńildikter kózdelgen, ınfraqurylym júrgizilip, basqa da qolaıly jaǵdaılar jasalyp jatyr. Sonyń arqasynda qazirgi tańda temirjol mashınalaryn jasaý jáne sheteldik kompanııanyń qatysýymen elektrobýs óndirý salasynda birqatar joba tabysty iske asyrylýda.

Úkimet tarapynan qoldaýdyń negizgi faktory – óndiristi lokalızatsııalaý deńgeıiniń joǵary bolýy. Biz Alstom kompanııasynyń elektrovozdardyń quramdas bólshekterin óndirý jáne qyzmet kórsetý ortalyqtaryn qurý arqyly jumys aıasyn keńeıtý nıetin qoldaımyz. Bul rette qazaqstandyq kásiporyndardy tarta otyryp, tolyq tsıklmen jáne joǵary lokalızatsııalaý deńgeıimen tolyqqandy óndiris qurý máselesin qarastyrýdy usynamyz. Óz tarapymyzdan biz jańa ınvestıtsııalyq jobalardy iske asyrý boıynsha járdem kórsetýge daıynbyz

, — dedi Álıhan Smaıylov.

Óz kezeginde Endrıý DeLeone kompanııanyń Qazaqstanda óndiristi odan ári damytýǵa jáne jańa jobalardy iske asyrýǵa múddeli ekenin rastady.

Biz Qazaqstanda 10 jyldan astam ýaqyttan beri jumys istep kelemiz. Osy kezeń ishinde biz júzdegen mln eýro ınvestıtsııa quıyp, júzdegen adamdy jumyspen qamtamasyz ettik. Bul bizdiń strategııalyq seriktestigimizdiń joǵary deńgeıde ekenin kórsetedi. QR Prezıdentiniń ótken jyly Frantsııaǵa sapary bizdiń ekijaqty baılanystarymyzdyń odan ári damýyna aıtarlyqtaı serpin berdi. Investıtsııa salýdy jalǵastyrǵysy keletin frantsýz kompanııalary úshin Qazaqstanda jaqsy yntalandyrý sharalary bar

, — dedi Endrıý DeLeone.

Ol Alstom kompanııasy búkil respýblıka boıynsha óziniń qyzmet kórsetý ortalyqtaryn qurý úshin taǵy 50-100 mln eýro ınvestıtsııa quıýdy qarastyryp jatqanyn aıtty.

Sonymen qatar biz jańa lokomotıvterdiń damýyn qoldap, tasymaldaý qaýipsizdigin arttyrý úshin el boıynsha ınfraqurylym áleýetin arttyrǵymyz keledi

, — dedi Endrıý DeLeone.

Oǵan qosa kezdesý barysynda taraptar QR tranzıttik kólik salasyn damytý perspektıvalaryn, atap aıtqanda, Transkaspıı halyqaralyq kólik baǵytynyń múmkindikterin keńeıtýdi talqylady.