Frantsııanyń Konstıtýtsııalyq keńesi zeınetaqy reformasyn maquldady

PARIJ. QazAqparat - Frantsııanyń Konstıtýtsııalyq keńesi jalpy zeınetaqy reformasyn maquldady. Bastamanyń barlyq derlik erejeleri, sonyń ishinde zeınet jasyn 62-den 64-ke deıin kóterý jáne járdemaqylardy azaıtý eldiń negizgi zańy men respýblıka qaǵıdattaryna sáıkes keledi, dep habarlaıdy QazAqparat euronews.com saıtyna silteme jasap.

Alty tarmaq qabyldanbady. Onyń ishinde 300-den astam qyzmetkeri bar kásiporyndar úshin egde jastaǵy jumysshylardyń eń tómengi sanyn engizýdi, sonymen qatar, Konstıtýtsııalyq Keńes oppozıtsııanyń zeınetaqy reformasy boıynsha referendým ótkizý týraly usynysyn qabyldamady.

Endi Frantsııa prezıdenti Emmanýel Makron túzetýler engizilgen jaǵdaıda óziniń saılaýaldy ýádeleriniń birin júzege asyratyn bastamaǵa qol qoıa alady. Elıseı saraıy rásimniń bul bóligin keshiktirýge bolmaıtynyn túsindirdi. Kelesi aptanyń basynda reforma kúshine enýi múmkin.

Al seısenbide Makron kásipodaq ókilderin kezdesýge shaqyrady. Reformaǵa qarsylar qazirdiń ózinde mundaı kelissózder ótkizý ekitalaı dep jaýap berip, naýryzda búkil el boıynsha birneshe mıllıonǵa jýyq adam jınalatyn jáne Frantsııadaǵy ǵasyr basynan bergi eń jappaı narazylyq sherýlerin jalǵastyrýǵa ýáde berdi.

Eske salaıyq, Frantsııada uzaq ýaqyt boıy zeınetaqy reformasyna qarsy aýqymdy narazylyq sharalary ótti. El boıynsha mıllıonǵa jýyq adam, sonyń ishinde bir ǵana Parıjde 300 myń adam kóshege shyqty.

Saýalnamalarǵa sáıkes, Frantsııa turǵyndarynyń 76%-y reformaǵa qarsy bolǵanymen, el boıynsha myńdaǵan narazylyqtarǵa qaramastan, Frantsııa senaty daýly reformany qoldady.

Frantsııa premer-mınıstri Elızabet Born zeınetaqy júıesine ózgerister engizý týraly zań jobasynyń parlamentte daýysqa salynbastan qabyldanǵanyn málimdedi.

Munan soń oppozıtsııa úkimetke senimsizdik votýmyn jarııalaıtynyn habarlady. Biraq, el úkimeti parlamentte jarııalanǵan senimsizdik votýmyn jeti daýyspen eńserdi.

Reformaǵa qarsy narazylyq aktsııalaryna búkil el boıynsha mıllıonnan astam adam qatysty.