Frantsııanyń Elshisi naýryz kóje daıyndaýdy úırendi

ASTANA. QazAqparat - Frantsııanyń Qazaqstandaǵy Tótenshe jáne Ókiletti elshisi Fılıpp Martıne Naýryz kóje daıyndaýdan sabaq aldy. Sonymen qatar Elshi myrza as daıyndaý barysynda qazaq tilin jetik meńgergenin de ańǵartty, dep habarlaıdy QazAqparat.

«Men osy meıramǵa oraı naýryz kóje ázirleýdi úırenemin. Ony daıyndaýdyń qyr-syryn maǵan Kúltaı hanym kórsetedi», - dep toqtaldy Fılıpp Martıne Frantsııa elshiliginiń áleýmettik jelidegi paraqshasynda. 

Naýryz kójeniń dámin alǵash ret tatyp turǵanyna toqtalǵan ol, ulttyq taǵam óte dámdi ekenin atap ótti.

«Barsha Qazaqstan halqyn jańa jylmen quttyqtaımyn! Naýryz ár otbasyna baq pen bereke, yrys pen yntymaq ákelsin. Jańa jylda Frantsııa men Qazaqstan arasyndaǵy yntymaqtastyq odan ary qaraı nyǵaıa tússin dep tileımin», - dedi Fılıpp Martıne taza qazaq tilindegi jetkizgen quttyqtaýynda.