Frantsııanyń burynǵy prezıdenti Nıkolıa Sarkozı sot aldynda jaýap berdi

NUR-SULTAN. QazAqparat – Jemqorlyq jáne tergeýge zańsyz qysym kórsetti dep aıyptalǵan Frantsııanyń eks-prezıdenti Nıkolıa Sarkozıge qatysty Parıjde tergeý bastaldy, dep habarlaıdy QazAqparat Deutsche Welle-ge silteme jasap.

2007-2012 jyldary eldi basqarǵan 65 jastaǵy Sarkozı 10 jylǵa bas bostandyǵynan aıyrylyp, 1 mln eýro kóleminde aıyppul tóleýi múmkin.

Іstiń materıaldary boıynsha, Nıkolıa Sarkozı 2014 jyly advokaty arqyly eks-prezıdentke qatysty bastalǵan kassatsııalyq sotta tergeý málimetterin alý úshin prokýror Jılber Azıberdi satyp almaq boldy dep aıyptalyp otyr.

Boljam boıynsha, 2007 jyly Sarkozıdiń saılaýaldy kampanııasyn L'Oreal kompanııasynyń murageri, mıllıarder Lılıan Bettankýr zańsyz qarjylandyrǵan.

2013 jyly Sarkozı bul kúdik boıynsha aqtalyp shyqty. Biraq Ádilet mınıstrligi onyń qorǵaýshysymen sóılesken áńgimesin jazyp, sol kelissózder eks-prezıdentke qarsy basqa istiń ashylýyna sebep boldy. Sarkozı taǵylǵan kináni joqqa shyǵaryp otyr.

Bul oqıǵa – soǵystan keıingi Frantsııa tarıhynda burynǵy memleket basshysynyń sot aldynda alǵash ret jaýap berýi. 2011 jyly Frantsııanyń eks-prezıdenti Jak Shırak ókilettiligin asyra paıdalandy jáne qoǵamdyq qorlardaǵy aqshany tıimsiz jaratty degen aıyppen shartty túrde eki jylǵa bas bostandyǵynan aıyrylǵan bolatyn. Biraq ol densaýlyǵyna baılanysty birde-bir sot otyrysyna qatysqan joq. 2019 jyly Shırak 86 jasynda qaıtys boldy.

Foto/ dw.com