Frantsııanyń Alstom kompanııasy Qazaqstandaǵy elektrovoz zaýytyndaǵy úlesin ulǵaıtty

ASTANA. QazAqparat - Parıjde Alstom men «QTJ» UK» AQ arasynda «Elektrovoz qurastyrý zaýyty» qazaq-frantsýz birlesken kásipornyndaǵy 25 paıyzdyq úlesin kontsernge ótkizý jónindegi kelisimge qol qoıyldy, dep habarlaıdy QazAqparat QTJ baspasóz qyzmetine silteme jasap.

Mańyzdy qujatqa «QTJ» UK» AQ Damý jónindegi vıtse-prezıdenti Maqsat Qabashev pen Alstom kontserniniń Taıaý Shyǵys jáne Afrıka boıynsha aǵa vıtse-prezıdenti Dıde Pfleger qol qoıdy.

Kelisim «QTJ» UK» AQ qurylymdyq aktıvin ońtaılandyryp, Qazaqstandaǵy tuńǵysh elektrovoz shyǵaratyn kásiporynǵa jańa tehnologııa men qarjy tartýdy kózdep, ónim túrin kóbeıtýge yqpal etedi.

«Kompanııanyń «EQZ» kásipornyndaǵy úlesin ótkizý temirjol salasyn ári qaraı jańǵyrtý maqsatyndaǵy jekeshelendirýdiń bıznesti transformatsııalaý saıasaty aıasynda júzege asyrylýda», - deıdi M. Qabashev.

Onyń aıtýynsha, qazirgi tańda zaýyt temirjol salasynyń KZ8A júk elektrovozyna suranysyn qanaǵattandyrýda. Jolaýshylar poıyzyn tartatyn KZ4AT serııasyndaǵy lokomotıvter shyǵarý 2018 jylǵa josparlanyp otyr.

D. Pflegerdiń aıtýynsha, kásiporyndaǵy Alstom úlesiniń kóbeıýi Qazaqstannyń ınvestıtsııalyq tartymdylyǵyn kórsetedi. Ol arqyly Qazaqstannyń óz ishinde ǵana emes, osy óńirdegi jyljymaly quram tartymyna qajetti suranysty joǵary deńgeıde sapaly tehnologııamen qamtamasyz etýge múmkindik áperedi.

Aıta keterligi, elektrovoz zaýyty 2012 jyly «QTJ» UK» AQ,  «Transmashholdıng» JAQ pen Frantsııanyń Alstom kompanııasymen birlesken joba retinde ashyldy. Kásiporyn Qazaqstannyń qatal aýa raıyna beıimdelgen elektrovozdar shyǵarady.