Frantsııalyq jýrnalıster ýran óndirýshi kásiporyndarmen tanysý úshin OQO-ǵa keldi

ShYMKENT. QazAqparat -  Frantsııalyq jýrnalıster Sozaq jerin aralap júr. Sheteldik tilshiler Sozaqtaǵy kásiporyndardyń, sonyń ishinde qazaq-frantsýz birlesken kompanııanyń jumysymen tanysyp, olardyń áleýmettik salaǵa kórsetip otyrǵan qoldaýyn keń aýqymda nasıhattamaq, dep habarlaıdy QazAqparat HAA tilshisi.

Frantsııalyq  jýrnalıster aldymen «Katko BK» JShS birlesken qazaq-frantsýz kásipornynda boldy. 1996 jyly qurylǵan kásiporyn búginde Sozaq aýdanyndaǵy Moıynqum, Tórtqudyq ýran ken ornyn barlaýmen jáne óńdeýmen  aınalysady.  Atom ónerkásibinde ózindik ornyn alǵan kásiporyn jergilikti halyqqa áleýmettik kómek te kórsetip keledi. Bul  kompanııa  osy ýaqytqa deıin Sozaq aýdanyna jalpy somasy 1 mlrd 89 mln teńgege mektep, balabaqshalar salyp berdi.  Mekemede 1289 qyzmetker jumys istese, onyń 52 paıyzy jergilikti turǵyndar.

«Katko» Qazaqstan-frantsýz birlesken kásiporny» álem boıynsha ýran óndirýden 1-orynda keledi. Biz Sozaq aýdany ákimdigimen jáne aýyl ákimderimen bıznestiń áleýmettik baǵdarlamasy aıasynda tyǵyz baılanysta jumys jasaımyz. Sońǵy 5 jyldyń ishinde jastardy Frantsııaǵa oqýǵa jiberip jatyrmyz.  Jastarǵa kóp senim artýdamyz», - deıdi seriktestiktiń bas dırektory Jerar Frıes.

Frantsýzdyq tilshiler taǵy birneshe óndiris ornyn aralap, Sozaq aýdanynyń búgingi tynys tirshiligimen tanysty. Aýyl turǵyndarymen sóılesip, aýdan basshylarymen júzdesti. Shaǵyn kásiporyndarǵa bas suǵyp, ondaǵy daıyn ónimderdi kórip shyqty.

«Men Qazaqstanǵa alǵash ret kelip turmyn. Mundaǵy halyqtyń qonaqjaılylyǵy, tartymdylyǵy óte qatty unady.  Munda bizge ýrannyń qalaı óndiriletinin kórsetti. Aldaǵy ýaqytta Sozaq aýdanyndaǵy kásiporyndar týraly óz gazetterimizde jarııalaımyz»,-deıdi  «La Provence» gazetiniń tilshisi Melodı Testı.

Óz kezeginde sheteldik tilshilermen kezdesken aýdan ákimi Salyhan Polatov jergilikti bılik pen halyqaralyq kompanııa tarapynan ekijaqty kelisim negizinde atqarylǵan jumystar jaıyn baıan etti. «Katko» kompanııasynyń basshylyǵy  áleýmettik salaǵa áli de bolsa, kómek qolyn sozatynyn jetkizdi.