Frantsııada jasóspirim óliminen keıingi ereýilde ustalǵandar sany 421 boldy

ASTANA. QazAqparat - Frantsııada qarsylyq órship barady. Halyq bılikten ádildik talap etip otyr, dep habarlaıdy QazAqparat BBC agenttigine silteme jasap.

Jalpy ereýilge 6 myńnan asa adam qatysqan. Turǵyndar jasóspirimniń ólimine sebep bolyp, qatygezdik kórsetken polıtsııany jazalaýdy talap etip otyr.

Halyqtyń jappaı bas kóterýine 17 jastaǵy jigittiń kóz jumýy túrtki boldy.

Frantsııanyń Nanter qalasynda talapqa baǵynbaǵan júrgizýshige polıtsııa oq atqan.

Bul jaǵdaı turǵyndardy dúrliktirdi.

Polıtsııa men narazylyq bildirýshiler arasyndaǵy qaqtyǵys úshinshi tún jalǵasyp, 421 adam qamaýǵa alyndy. Ustalǵandardyń kóbi - 14-18 jas aralyǵyndaǵy jasóspirimder.

Parıjde polıtsııanyń kóp bolýyna qaramastan dúkender tonalyp, kólikter órtendi.

Jasóspirimdi atqan polıtsııa qyzmetkeri marqumnyń otbasynan keshirim surady. Oǵan óz erkimen kisi óltirdi degen aıyp taǵyldy.

17 jasar Naeldiń anasy buǵan deıin búkil polıtsııany kinálamaıtynyn aıtqan, ol tek balasyn óltirgen ofıtserdi jazalaýdy surap otyr.

«Ol arabtyń kishkentaı balasynyń júzine tike qarap turyp atyp tastady», - deıdi ol.

Keshe, beısenbide tústen keıin myńdaǵan adam Naeldiń anasy bastaǵan beıbit qurmet sherýine qatysty.

Eske sala keteıik, biz buǵan deıin narazylyq sherýi ótip jatqan Frantsııa qalalaryna tártip ornatý úshin 40 myń polıtseı jóneltiletinin habarlaǵan bolatynbyz.

Bul týraly eldiń ishki ister mınıstri Jerald Darmanen 29 maýsym, beısenbi kúni málimdegen.